یومِ آزادی: چین میں پاکستانی سفارتخانے نے 7 دستاویزی فلمیں جاری کر دیں

14 اگست ، 2022

پاکستان کے 75 ویں یومِ آزادی کے موقع پر چین میں پاکستانی سفارت خانے کی جانب سے پاکستانی تہذیب، ثقافت، رواج، روایات اور تاریخی ورثے کو فروغ دینے کے لیے 7 مختصر دورانیے کی دستاویزی فلموں کی سیریز کا اجراء کیا گیا ہے۔

2 منٹ کے دورانیے کی ان 7 دستاویزی فلموں کو چینی سوشل میڈیا پر گزشتہ دنوں ریلیز کیا گیا، جس کا مقصد چینی سوشل میڈیا صارفین کو پاکستان کے بارے میں بہتر انداز میں سمجھانا ہے۔

چینی میڈیا کے مطابق یہ دستاویزی فلمیں پاکستانی پکوان کی لذتوں، نایاب دست کاری، باسمتی چاول، تہواروں، فنِ تعمیر کے ذخیرے، فنکارانہ مہارت سے تیار کردہ عمدہ قالین، مارخور کے مجسمے وغیرہ کو بھرپور انداز میں اجاگر کر رہی ہیں۔

چین میں کوائیشو، ڈوئین اور ویبوکے نامی 3 مقبول سوشل میڈیا پلیٹ فارمز پر جاری کیے گئے ان تمام کلپس پر چینی شہریوں نے مثبت ردِعمل کا اظہار کیا ہے اور وہ پاکستان کے دورے سمیت یہاں کی مصنوعات میں خوب دل چسپی دکھا رہے ہیں۔