فرمان الہی
نماز کے اوقات
کراچی (ٹی وی رپورٹ)جیو نیوز اور اے بی پی نیوز کے ”پاک بھارت ٹاکرا“ میں گفتگو کرتے ہوئے سابق پاکستانی و بھارتی کرکٹرز نے ایشیا کپ میں پاک بھارت میچ میں ممکنہ طور پر میچ ونر کھلاڑیوں کے نام بتادیئے۔ انضمام الحق نے کہا کہ پاک بھارت میچ میں محمد رضوان اہم کردار اد اکرے گا، عاقب جاوید کا کہنا تھا کہ بیٹنگ میں فخر زمان اور باؤلنگ میں حارث رؤف بہترین کھلاڑی ہوں گے، سکندر بخت نے کہا کہ محمد رضوان اور نسیم شاہ پاک بھارت میچ کے ہیرو ہوں گے۔کپل دیو نے کہا کہ ہاردیک پانڈیا اور رشبھ پنت کسی وقت بھی گیم چینج کرسکتے ہیں۔ اتل واسن کا کہنا تھا کہ بابر اعظم اور یجوندھر چہل پاک بھارت میچ میں باہوبلی ہوسکتے ہیں۔ونود کامبلی نے ویرات کوہلی جبکہ ویویک نے ایشون اور یجوندھر چہل کو ممکنہ طورپر میچ کے بہترین کھلاڑی قرار دیا۔وقار یونس کا کہنا تھا کہ پاک بھارت میچ میں نئی بال بہت اہم ہوگی، نسیم شاہ یا ہاردیک پانڈیا میچ کے باہو بلی ہوں گے۔ اس خصوصی نشریات میں پاکستان سے میزبان دانش انیس تھے جبکہ اے بی پی نیوز میں رومانہ خان اور جی ایس وویک میزبانی کے فرائض انجام دے رہے تھے۔پروگرام میں انڈیا سے کپل دیو،اتل واسن اور ونود کامبلی جبکہ پاکستان سے انضمام الحق، عاقب جاوید اور سکندر بخت شریک تھے جبکہ دبئی سے وقار یونس بھی شامل گفتگو ہوئے۔سابق بھارتی کپتان کپل دیو نے کہا کہ پاک بھارت میچوں میں دونوں ٹیموں سے کچھ بڑے کھلاڑی نہ کھیل رہے ہوں تو ملال ہوتا ہے، ویرات کوہلی نے جتنا انڈیا کو دیا بہت کم کھلاڑیوں نے دیا ہے، کے ایل راہول کبھی بھی واپس آسکتے ہیں، پاکستان اور بھارت دونوں کے اوپنرز اور باؤلرز بہت اچھے ہیں، انڈیا میں ٹاپ آرڈ ر کے علاوہ آخرتک بیٹنگ مضبوط ہے، رشبھ پنت چھ نمبر پر اور ہاردیک پانڈیا سات نمبر پر آتا ہے، پاکستان کے پاس اوپنرز اور فاسٹ باؤلرز کی قوت ہے۔سابق کرکٹ ونود کامبلی نے کہا کہ میں نے پاکستان کیخلاف میچ میں ڈیبیو کیا تھا جہاں مجھے عمران خان، وسیم اکرم اور وقار یونس جسے باؤلنگ اٹیک کا سامنا کرنا پڑا تھا۔اتل واسن نے کہا کہ انڈیا کا پیس اٹیک اس وقت ہلکا نظرآرہا ہے، جسپریت بمراہ انجرڈ ہوئے اچھی بات ہے اس طرح دوسرے لڑکوں کو بھی ہائی پریشر میچ میں کھیلنے کا موقع ملے گا، بھگوان نے جاوید میانداد کو بنانے کے بعد وہ ڈائی توڑ دی تھی، کے ایل راہول کا رنز بنانا بہت اہم ہوگا، آج کل کے کھلاڑی کسی دوسرے کھلاڑی کو ہلکا نہیں لیں گے، کسی نئے کھلاڑی کو بھی نظرانداز نہیں کیا جاسکتا کوئی بھی میچ جتواسکتا ہے، آئی سی سی اور براڈ کاسٹرز پاک انڈیا میچ پر ایسی ہائپ پیدا کرتے ہیں کہ ایسا لگتا ہے میچ سے فیصلہ ہوگا کون سا ملک بہتر ہے۔دبئی سے گفتگو کرتے ہوئے وقار یونس نے کہا کہ پاک بھارت میچ میں کھلاڑیوں پر بہت دباؤ ہوگا، پاکستان کو شاہین شاہ آفریدی کی صورت ایک بڑا ایج حاصل تھا، حسن علی کی ٹیم میں واپسی ہوئی ہے ان کا پاکستان کو ایج حاصل ہے۔انضمام الحق نے کہا کہ کرکٹ کو کھیل ہی رہنے دیا جائے تو بہتر ہے، پاک بھارت میچوں کو جنگ کی شکل نہ دی جائے، پہلی دفعہ پاکستان اور انڈیا دونوں ٹیمیں جدوجہد کرتی نظرآرہی ہیں، پاک انڈیا میچ کا جوش و جنون الگ ہی ہوتا ہے، پاکستان او ر بھارت دونوں کے ٹاپ آرڈر بیٹرز بہت زبردست ہیں، روہت اور راہل کھڑے ہوگئے تو کسی بھی باؤلنگ کو تباہ کرسکتے ہیں، بابر اعظم اور محمد رضوان بھی کھڑے ہوجائیں تو میچ فنش کرسکتے ہیں۔
