عمران خان کا وژن بھینس بیچنے سے شروع، گھڑی بیچنے پر ختم ہوتا ہے: حافظ حمد اللّٰہ

04 دسمبر ، 2022

پی ڈی ایم کے ترجمان حافظ حمد اللّٰہ کا کہنا ہے کہ عمران خان کا وژن بھینس بیچنے سے شروع اور گھڑی بیچنے پر ختم ہو جاتا ہے۔

ترجمان پی ڈی ایم حافظ حمد اللّٰہ نے بہاولنگر کے علاقے منچن آباد میں میڈیا سے گفتگو کرتے ہوئے کہا کہ عمران خان کی معیشت انڈے، مرغی سے شروع، کٹے اور بھینس پر ختم ہوتی ہے۔

ان کا کہنا ہے کہ پی ڈی ایم کا فیصلہ ہے کہ حکومت اپنی مدت پوری کرے گی، عمران خان کو الیکشن کی تاریخ ہم دیں گے، الیکشن اکتوبر میں ہوں گے۔

حافظ حمد اللّٰہ نے کہا کہ ملک کے معاشی حالات نے اجازت نہیں دی تو الیکشن اکتوبر 2024ء میں ہوں گے، عمران خان اپنی مرضی سے الیکشن کی تاریخ چاہتے ہیں۔

انہوں نے مزید کہا کہ اسمبلیاں تحلیل کرنا بچوں کا کھیل نہیں، کرکٹ نہیں یہ سیاست ہے، کل عمران خان نے مذاکرات کی بات کی اور آج مذاکرات سے منحرف ہو گئے۔

پی ڈی ایم کے ترجمان نے یہ بھی کہا کہ عمران خان مرضی کا چیف الیکشن کمشنر، آرمی چیف، چیف جسٹس، قانون و آئین چاہتے ہیں، عمران خان کی سیاست بیساکھیوں پر قائم ہے۔

قومی خبریں سے مزید