پاکستانی نوجوان ’روہان‘ کے جاپان میں چرچے کیوں ہو رہے ہیں؟

جاپان میں پاکستانی نوجوان ہیرو بن گیا، جاپانی میڈیا میں روہان نامی نوجوان کے چرچے ہو رہے ہیں۔

تفصیلات کے مطابق گزشتہ دنوں جاپان کے صوبے آئیچی کین میں ایک گاڑی کا ایکسیڈنٹ ہوا اور گاڑی پلٹ گئی جس کے بعد جاپانی پولیس موقع پر پہنچی اور کافی کوششوں کے بعد بھی تین پولیس اہلکار مل کر بھی اس گاڑی کو سیدھا نہیں کر پائے، اتنے میں قریب میں موجود روہان نامی پاکستانی جو یہ منظر دیکھ رہا تھا دوڑ کر پولیس کی مدد کو پہنچا۔

چھ فٹ اونچا اور جسمانی طاقت سے بھرپور روہان نے صرف دس سیکنڈ میں اپنی طاقت سے گاڑی کو سیدھا کردیا، یہ منظر کیمرے کی آنکھ میں بھی محفوظ ہوگیا جس کے بعد جاپانی میڈیا پر روہان کو ہیرو قرار دیا جا رہا ہے۔

اس حوالے سے جب روہان سے بات کی گئی تو اس نے بھی دیکھنے والوں کے دل جیت لیے،۔

روہان نے کہا کہ میں کافی دیر سے دیکھ رہا تھا کہ پولیس والے گاڑی کو سیدھا کرنے کی کوشش کررہے ہیں اور ناکام نظر آرہے ہیں لہٰذا وہ فوری طور پر پولیس کو مدد کو پہنچا اور گاڑی کو سیدھا کردیا۔

روہان نے کہا کہ میرے لیے یہ اہم نہیں تھا کہ گاڑی کس کی تھی لیکن یہ اہم تھا کہ کوئی شخص پریشان ہے اور مجھے اس کی مدد کرنی ہے، روہان کے ان لفظوں نے جاپانی قوم کو مزید اپنا گرویدہ بنا لیا ہے۔

اس حوالے سے جاپان میں پاکستانی سفیر رضا بشیر تارڑ نے بھی روہان کی تعریف کرتے ہوئے کہا ہے کہ ایسے نوجوان پاکستان کی اصل شناخت ہیں اور ان کی وجہ سے ہی پاکستان کا بیرون ملک امیج بہتر ہوتا ہے۔

سفیر پاکستان نے کہا کہ وہ جَلد اس نوجوان کو سفارتخانہ پاکستان آنے کی دعوت دیں گے اور تعریفی سرٹیفیکیٹ بھی دیں گے تاکہ ناصرف روہان بلکہ دیگر پاکستانیوں کی بھی حوصلہ افزائی ہوسکے۔

سفیر پاکستان نے جاپان میں مقیم پاکستانیوں سے اپیل کی ہے کہ وہ جاپانی قوم میں اپنے بہترین کردار اور اخلاق سے ناصرف پاکستانی کمیونٹی بلکہ پاکستانی قوم اور ملک کا نام روشن کرنے کے لیے بھی کردار ادا کریں۔