فرمان الہی
نماز کے اوقات
آنجہانی نوجوان اداکارہ تونیشا شرما نے خودکشی سے کچھ دیر پہلے کس سے بات کی؟ پولیس کیس سے متعلق چند نئی تفصیلات سامنے لے آئی۔
مہاراشٹرا پولیس نے 20 سالہ تونیشا شرما کی موت سے متعلق انکشاف کیا کہ اداکارہ نے خودکشی سے پہلے اپنی آخری بات چیت ساتھی اداکار شیزان خان سے کی تھی۔
پولیس کے مطابق آنجہانی اداکارہ نے موت سے کچھ دیر پہلے ہی ملزم شیزان سے بات چیت کی تھی۔
پولیس نے کیس سے متعلق نئے انکشافات شیزان خان کے ریمانڈ میں 2 روز کی توسیع ملنے کے کچھ گھنٹے بعد کیا۔
پولیس نے مزید کہا کہ شیزان خان جو 30 دسمبر تک ہماری تحویل میں ہیں، وہ کیس کی تفتیش میں تعاون نہیں کررہے۔
پولیس اب تک کیس کی تحقیقات کے دوران 18 افراد کے بیانات ریکارڈ کرچکی ہے۔
بھارتی میڈیا رپورٹ کے مطابق پولیس نے بتایا کہ اداکارہ نے خود کو پھانسی لگانے سے پہلے شیزان سے بات چیت کی تھی۔
اس سے پہلے پولیس نے کہا تھا کہ تونیشا شرما اور شیزان خان کے درمیان اداکارہ کی موت سے 15 دن قبل بریک اپ ہوگیا تھا۔
20 سالہ اداکارہ نے اپنے ٹی وی شو علی بابا داستان کابل کے سیٹ پر خودکشی کی، جس کے اگلے ہی روز پولیس نے شیزان خان کو حراست میں لے لیا۔
پولیس نے پہلے عدالت سے 4 روز کا ریمانڈ حاصل کیا اور آج دن مکمل ہونے پر کورٹ سے مزید 2 دن کی تحویل لینے میں کامیاب رہی۔
دوسری طرف تونیشا کے انکل پون شرما نے پولیس کے حوالے سے بتایا کہ شیزان خان کے دیگر عورتوں کے ساتھ بھی تعلقات تھے۔
انہوں نے مزید کہا کہ میری بھتیجی شیزان خان سے ملاقاتوں کے بعد حجاب لینے لگی تھی، کیس کی تفتیش دیگر اینگل سے بھی ہونی چاہیے۔
