گھوٹکی: کوئی خاتون کی آواز پر، کوئی امداد یا سستا مویشی لینے گیا، اغواء ہو گیا

تازہ ترین

خاص رپورٹ

22 جنوری ، 2023

سندھ کے ضلع گھوٹکی میں کچے کے علاقے میں پولیس کا آپریشن جاری ہے جس کے دوران کئی مغویوں کو بازیاب کرا لیا گیا ہے۔

پولیس کے ڈاکوؤں کے خلاف ٹارگٹڈ آپریشن کے دوران 2 ملزمان زخمی ہوئے ہیں۔

مغویوں میں سے کسی کو سیلاب سے تباہ گھر بنانے کے لیے امداد دینے کے لیے بلایا گیا تو کوئی سستے مویشی یا ٹریکٹر خریدنے گیا، کوئی خاتون کی آواز فون پر سن کر ملنے گیا اور ڈاکوؤں کے ہاتھوں یرغمال بن گیا۔

پولیس کے مطابق مغویوں کا تعلق پشین، کوئٹہ، تنگوانی اور حیدرآباد سے ہے، جو 1 سے 4 ماہ تک یرغمال بنے رہے۔

پولیس نے بتایا ہے کہ مغویوں سے 30 لاکھ روپے سے 1 کروڑ روپے تک تاوان طلب کیا گیا تھا۔

بازیاب ہونے والے سیلاب سے متاثرہ شخص نے ’جیو نیوز‘ سے گفتگو میں بتایا کہ سیلاب میں گھر تباہ ہو گیا تھا، سوشل میڈیا پر مدد مانگی تو ڈاکوؤں نے امداد کا جھانسہ دے کر بلا لیا۔

ایک اور بازیاب شخص عصمت اللّٰہ کا کہنا ہے کہ سستی گائے اور بھینس کی تصویر دکھائی گئی، خریدنے گیا تو اغواء کر لیا گیا۔

بازیاب مغوی محمد بخش کے مطابق سوشل میڈیا پر ٹریکٹر کا اشتہار دیکھا، خریدنے کے لیے آیا تو اشتہار دینے والوں نے اغواء کر لیا۔

لودھراں سے تعلق رکھنے والے 4 افراد منی ٹرک خریدنے کچے کے علاقے آئے تھے جو اغواء ہو گئے۔

ایس ایس پی کے مطابق کندھ کوٹ کے کچے کے علاقے میانی میں پولیس کی کارروائی کے دوران ڈاکوؤں نے پولیس پر فائرنگ کی۔

ایس ایس پی نے بتایا ہے کہ پولیس نے جوابی فائرنگ کی تو ڈاکو فرار ہو گئے، ایک گھنٹے کے مقابلے کے بعد ڈاکو 3 مغویوں کو چھوڑ کر فرار ہو گئے۔

ایس ایس پی کا یہ بھی کہنا ہے کہ ڈاکوؤں نے تینوں افراد کو خواتین کے آواز میں بلا کر اغواء کیا تھا۔

گزشتہ روز بڑی تعداد میں شہریوں کے یرغمال بنائے جانے کی اطلاعات پر اوباڑو میں کچے کےعلاقے میں ڈاکوؤں کے خلاف پولیس آپریشن شروع کیا گیا تھا۔

گھوٹکی میں رونتی کے کچے کے علاقے میں ڈاکوؤں کے خلاف ٹارگٹڈ آپریشن آج بھی جاری ہے، یہ آپریشن خفیہ اطلاعات پر کیا جارہا ہے جس میں 2 سو پولیس اہلکار اور 6 بکتر بند گاڑیاں حصہ لے رہی ہیں۔