فرمان الہی
نماز کے اوقات
قومی اسمبلی میں قائد حزب اختلاف راجا ریاض نے پاکستان تحریک انصاف (پی ٹی آئی) کے وائس چیئرمین شاہ محمود قریشی کو عمران خان کو عہدے سے فارغ کرنے کا مشورہ دے دیا۔
فیصل آباد میں پریس کانفرنس کے دوران راجا ریاض نے شاہ محمود قریشی کو فوری طور پر پی ٹی آئی کی سینٹرل ایگزیکٹو کمیٹی (سی ای سی) کا اجلاس بلانے کا مشورہ دیا۔
انہوں نے کہا کہ پی ٹی آئی کے وائس چیئرمین سی ای سی اجلاس میں تمام اراکین اور ایم این ایز کو بلائیں۔
راجا ریاض نے مزید کہا کہ شاہ محمود قریشی سی ای سی اجلاس میں عمران خان کو پی ٹی آئی کی چیئرمین شپ کے عہدے سے فارغ کریں۔
ان کا کہنا تھا کہ عمران خان دہشت گرد تنظیم کے چیئرمین بن چکے ہیں، شاہ محمود قریشی پی ٹی آئی کو اس دہشت گرد تنظیم سے الگ کریں۔
اپوزیشن لیڈر نے یہ بھی کہا کہ میں ابھی تک تحریک انصاف میں ہوں، پی ٹی آئی کے بنانے کا مقصد فوت ہو چکا ہے۔
انہوں نے کہا کہ زمان پارک سے دہشت گردی ہورہی ہے، پولیس پر پیٹرول بم پھینکنے والوں کے خلاف کارروائی کی جائے۔
راجا ریاض نے کہا کہ ماضی میں کوئی حکمران جتھے لے کر عدالتوں میں نہیں گیا، اربوں روپے کی کرپشن پر کارروائی ہونی چاہیے، مہنگائی کے ستائے عوام کو ریلیف دیا جائے۔
