فرمان الہی
نماز کے اوقات
1۔ گلشن کی پہچان ہے اُس سے
گل دانوں میں جان ہے اُس سے
اُس کے بنا ہر سیج ادھوری
ہر محفل کی شان ہے اُس سے
تتلی کو محبوب وہی ہے
بھونرے کو مرغوب وہی ہے
نفرت سے کیا لینا اُس کو
اُلفت سے منسوب وہی ہے
۔۔۔۔۔۔۔۔۔۔۔
2۔ ہر دم پیار لٹانے والی
ہر پل ناز اُٹھانے والی
ہم سب کے آرام کی خاطر
اپنا چین گنوانے والی
دُور کی کوڑی آج نہ لاؤ
جھٹ سے اُس کا نام بتاؤ
اک اک کر کے پھر اے بچو
اُس کے احسانات گناؤ
۔۔۔۔۔۔۔۔۔۔۔
3۔ ریشم جیسے بال ہیں اُس کے
نرم بہت ہی گال ہیں اُس کے
کان ہیں چھوٹے، مونچھیں لمبی
ناک ہے چپٹی، دُم ہے موٹی
رشتے میں ہے شیر کی خالہ
گویا آفت کا پرکالہ
بچو، اُس کا نام بتاؤ
پھر اُس کی تصویر بناؤ
۔۔۔۔۔۔۔۔۔۔۔
بوجھو تو جانیں کے جوابات 1- پھول 2۔ ماں 3۔ بلّی
