فرمان الہی
نماز کے اوقات
بہت کم لوگ جانتے ہیں کہ بھارتی معروف سینئر اداکارہ ہیما مالنی اور لیجنڈری اداکارہ دھرمیندرا کی رومانس سے بھری محبت کی کہانی بھی کسی فلم سے کم نہیں۔
بالی ووڈ کی اس فلمی جوڑی نے حقیقت میں ایک دوسرے کو پانے کے لیے کئی جتن اور خاندان کی ناراضی تک مول لے لی تھی۔
بھارتی میڈیا رپورٹس کے مطابق ہیما مالنی کی سوانح حیات ’ہیما مالنی: بی یونڈ دی ڈریم گرل‘ میں اس بات کا انکشاف کیا گیا تھا کہ اداکارہ کی والدہ جیا چکراورتھی نے اپنی بیٹی کی دلچسپی دھرمیندرا میں بھانپ لی تھی، دونوں کی بڑھتی قربتیں دیکھ کر جیا چکراورتھی اور اُن کے شوہر نے فیصلہ کیا کہ ہیما کی کہیں اور شادی کر دینی چاہیے۔
اداکارہ ہیما کے والدین کی ہیما مالنی کے ذہن سے دھرمیندرا کو نکالنے کی کوشش کرنے کے پیچھے سب سے بڑی وجہ یہ تھی کہ دھرمیندرا پہلے سے شادی شدہ اور بچوں کے باپ تھے جبکہ ہیما مالنی کنواری تھیں۔
اسی لیے اداکارہ کے والدین اس رشتے کے حق میں نہیں تھے، ہیما مالنی کے لیے ان کی والدہ نے اداکار جتیندرا کا انتخاب کیا اور جتیندرا بھی کسی حد تک ہیما مالنی کو پسند کرتے تھے۔
ہیما مالنی کی سوانح حیات میں بتایا گیا کہ ہیما کے والدین نے تذبذب کا شکار اپنی بیٹی ہیما کو جتیندرا سے شادی کے لیے رضامند کر لیا تھا، ہیما اور جتیندرا کی شادی کی تیاریاں مدراس میں مکمل ہوئیں، شادی کا منڈپ تک سج گیا اور کارڈز بھی تقسیم کردیے گئے تھے۔
کارڈز تقسیم ہوئے تو دوسرے شہر میں موجود دھرمیندرا کو یہ خبر ملی، وہ نشے میں دُھت شادی والے روز ہیما کے منڈپ میں پہنچے اور شادی روکنے کا مطالبہ کردیا، اس موقع پر دھرمیندرا نے درخواست کی تھی کہ وہ ہیما مالنی سے اکیلے میں کچھ اہم بات کرنا چاہتے ہیں۔
بعد ازاں دونوں کے درمیان طویل گفتگو ہوئی جس کے بعد اداکارہ ہیما نے جتیندرا سے شادی سے انکار کر دیا۔
بھارتی میڈیا رپورٹس میں کے مطابق دھرمیندرا شادی رُکوانے اکیلے نہیں بلکہ جتیندرا کی گرل فرینڈ شوبھا کے ہمراہ پہنچے تھے اور جس وقت دھرمیندرا اور ہیما کمرے میں محو گفتگو تھے، اس وقت شوبھا نے موقع جان کر جتیندرا سے بات کی اور اُنہیں اپنی محبت کا یقین دلایا۔
بعدازاں نہ نہ کرتے بھی اداکارہ کی والدہ کو ہیما اور دھرمیندرا کے رشتے کو تسلیم کرنا پڑا۔
واضح رہے کہ جتیندرا اور شوبھا کی شادی 1974ء میں ہوئی تھی اور ان کے دو بچے اداکار تُشار کپور اور نامور پروڈیوسر ایکتا کپور ہیں۔
دوسری جانب ہیما اور دھرمیندرا 1980ء میں رشتۂ ازدواج میں منسلک ہوئے تھے، ان کی دو بیٹیاں اداکارہ ایشا دیول اور اہانا دیول ہیں۔
