غربت مٹانے کیلئے بے نظیر انکم سپورٹ پروگرام کا بجٹ ناکافی قرار

03 اکتوبر ، 2023

عالمی بینک نے غربت مٹانے کے لیے بے نظیر انکم سپورٹ پروگرام کا بجٹ ناکافی قرار دے دیا۔

عالمی بینک نے گاڑیوں کی خریداری، اخراجات میں کمی، تنخواہ اور پینشن اسٹرکچر اصلاحات پر زور دیا ہے۔

عالمی بینک کی رپورٹ میں کہا گیا ہے کہ 20 سال قبل غربت کم تھی، بے نظیر انکم سپورٹ پروگرام کا بجٹ بڑھانا ہو گا۔

عالمی بینک کی جانب سے کہا گیا ہے کہ گزشتہ 20 برس سے پاکستان میں غربت میں اضافہ ہو رہا ہے، آئندہ مالی سال غربت 39.4 فیصد سے کم ہو کر 35 فیصد تک رہنے کا امکان ہے۔

عالمی بینک نے کہا ہے کہ رائز ٹو پروگرام کے تحت 35 کروڑ ڈالر بورڈ کی منظوری سے جلد ملیں گے، رواں مالی سال پاکستان کی معاشی گروتھ 1.7 فیصد تک رہ سکتی ہے۔

رپورٹ میں یہ بھی کہا گیا ہے کہ رواں مالی سال 1.6 ارب ڈالر وفاق اور صوبوں کے منصوبوں کے لیے جاری ہوں گے۔

رپورٹ میں کہا گیا ہے کہ ریئل اسٹیٹ شعبے میں سرمایہ کاری کے لیے لوگوں میں اعتماد کا فقدان ہے، زرعی شعبے کی گروتھ 2.2 فیصد، صنعت 1.4، سروسز سیکٹر کی گروتھ 1.5 فیصد رہ سکتی ہے۔

عالمی بینک کا کہنا ہے کہ رواں مالی سال مہنگائی 26.5 فیصد اور کرنٹ اکاؤنٹ خسارہ جی ڈی پی کا 1.4 فیصد رہ سکتا ہے، مالیاتی خسارہ جی ڈی پی کا 7.7 فیصد اور ڈیٹ ٹو جی ڈی پی 72.4 فیصد رہ سکتا ہے۔

رپورٹ میں کہا گیا ہے کہ انرجی مکس منصوبوں سے 5 سے 10 سال میں انرجی قیمتوں میں کمی آسکتی ہے، پاکستان میں درآمدی فیول پر انحصار کے باعث انرجی پرائسز زیادہ ہیں، انرجی ٹیرف کم رکھا گیا جس کے باعث گردشی قرضے کے مسائل بڑھے، انرجی سیکٹر میں اصلاحات ناگزیر، ڈسٹری بیوشن اور ٹرانسمیشن کے مسائل حل کرنا ہوں گے۔

تجارتی خبریں سے مزید