نئے الیکشن ٹریبونل کو آئندہ سماعت تک کارروائی سے روک دیا گیا

11 جون ، 2024

اسلام آباد ہائی کورٹ نے الیکشن ٹریبونل تبدیل کرنے پر اظہارِ برہمی کرتے ہوئے نئے الیکشن ٹریبونل کو آئندہ سماعت تک کارروائی سے روک دیا۔

اسلام آباد ہائی کورٹ کے چیف جسٹس عامر فاروق نے الیکشن ایکٹ ترمیمی آرڈیننس کے خلاف عامر مسعود اور دیگر کی درخواستوں پر سماعت کی۔

سماعت کے دوران چیف جسٹس عامر فاروق نے استفسار کیا کہ الیکشن کمیشن نے کس گراؤنڈ پر ٹریبونل تبدیل کر دیا؟ بظاہر الیکشن کمیشن کا فیصلہ درست نہیں ہے، آپ تعصب ثابت کریں یا پھر توہینِ عدالت کی کارروائی کا سامنا کریں۔

انہوں نے سوال کیا ہے کہ کیا ایمرجنسی تھی کہ راتوں رات آرڈی نینس آ گیا؟ الیکشن کمیشن نے ریکارڈ کس اختیار کے تحت منگوایا ہے؟ الیکشن کمیشن سوچ کر وقفے کے بعد جواب دے، الیکشن کمیشن کا الیکشن ٹریبونل ٹرانسفر کرنے کا فیصلہ برقرار نہیں رہ سکتا۔

عدالت نے استفسار کیا کہ الیکشن کمیشن نے کس گراؤنڈ پر ٹریبونل تبدیل کر دیا؟

الیکشن کمیشن کے وکیل نے جواب دیا کہ پروسیجر پر عمل درآمد نہیں کیا گیا، ٹریبونل نے پروسیجر فالو نہیں کیا۔

چیف جسٹس نے کہا کہ کس نے پروسیجر پر عمل درآمد نہیں کیا؟ کیا ٹرانسفر کی نئی مثال قائم کر رہے ہیں؟ بظاہر الیکشن کمیشن کا فیصلہ درست نہیں ہے، اگر تعصب ہے تو وہ بتائیں، آپ تعصب ثابت کریں یا پھر توہینِ عدالت کی کارروائی کا سامنا کریں۔

چیف جسٹس عامر فاروق نے کہا کہ جسٹس طارق محمود جہانگیری اس عدالت کے فاضل جج ہیں، الیکشن کمیشن نے میری سفارش پر خود ہی جسٹس طارق جہانگیری کو ٹریبونل کا جج بنایا تھا، الیکشن کمیشن آرڈر چیلنج کر لیتا لیکن ٹرانسفر کیسے اور کیوں کیا ہے؟ تعصب کی بنیاد پر کیس ٹرانسفر کیا جاتا ہے مگر اس کا بھی طریقہ ہے، سب سے پہلے متعلقہ جج سے ہی درخواست کی جاتی ہے کہ وہ کیس نہ سنے، سرکار مجھےسمجھائے کہ سال پہلے یہ ترمیم ختم کی، اب پھر آرڈیننس کے ذریعے لے آئے، میں تو سوچ رہا تھا کہ اس پر آج درخواست آ جائے گی۔

فیصل چوہدری ایڈووکیٹ نے کہا کہ درخواست تیار ہے، دائر ہونا باقی ہے۔

شعیب شاہین ایڈووکیٹ نے استدعا کی کہ الیکشن کمیشن کے فیصلے کو چیلنج کریں گے، عدالت اسٹیٹس کو برقرار رکھے، معاملہ جوں کا توں رکھنے کا آرڈر جاری کر دے، الیکشن ٹریبونل کے جج کے بارے میں یہ کہا گیا کہ جج صاحب جلدی میں ہیں۔

چیف جسٹس نے الیکشن کمیشن کے وکیل کو مخاطب کر کے کہا کہ اگر قاعدے قانون کے تحت چلنا ہے تو آرڈر کو چیلنج کریں، ٹریبونل کو ٹرانسفر نہ کریں، تعصب کا بھی کوئی الزام نہیں ہے، پھر کیسے ٹرانسفر آرڈر کیا؟

شعیب شاہین ایڈووکیٹ نے کہا کہ میڈیا سے سامنے آ رہا ہے کہ ریٹائرڈ جج جسٹس شکور پراچہ کو ٹریبیونل کا جج مقرر کیا گیا ہے۔

چیف جسٹس عامر فاروق نے کہا کہ الیکشن کمیشن کے پاس ریکارڈ منگوانے کا کونسا اختیار ہے؟ کس قانون کے تحت الیکشن کمیشن نے ریکارڈ منگوایا تھا؟ یہ ساری وہ چیزیں ہیں جن کا جواب الیکشن کمیشن کو دینا ہے، الیکشن کمیشن آئینی باڈی ہے اس لیے اسے نوٹس جاری کر کے جواب طلب کیا تھا، عزت احترام والی تو بات ہی نہیں ہے، یہ دیکھ لیتے کہ معاملہ ہائی کورٹ میں ہے تو انتظار کر لیں، الیکشن ٹریبونل کا نوٹیفکیشن آپ کے پاس نہیں تو پھر میڈیا کے پاس کیسے چلا گیا؟ الیکٹرانک میڈیا کو نئے ٹریبونل کی تشکیل کا کیسے معلوم ہوا؟

سماعت میں وقفہ

اس کے ساتھ ہی عدالت نے 2 بجے تک سماعت میں وقفہ کر دیا۔

وقفے کے بعد سماعت

اسلام آباد ہائی کورٹ میں الیکشن ایکٹ ترمیمی آرڈی نینس کے خلاف درخواستوں پر وقفے کے بعد سماعت دوبارہ شروع ہوئی تو عدالت نے الیکشن کمیشن کے حکام سے مخاطب ہو کر کہا کہ آپ قانونی آدمی ہیں، آپ کے ہوتے ہوئے اس قسم کا آرڈر ہوا ہے۔

الیکشن کمیشن کے نمائندے نے کہا کہ فیصلہ الیکشن کمیشن نے کیا، کچھ قانونی نکات پر عدالت کی معاونت کروں گا۔

چیف جسٹس عامر فاروق نے کہا کہ ابھی تو آپ نے ٹرانسفر کا آرڈر کیا ہے، ٹرانسفر کس بنیاد پر کیا ہے؟ وہ شاہکار آرڈر تو مجھے دکھائیں، وہ ہے کیا؟ کسی آرڈر سے آپ کو اعتراض تھا تو سپریم کورٹ میں چیلنج کر لیتے، یہ الیکشن کمیشن کیا مثال قائم کر رہا ہے؟ آپ اگر آرڈر کا دفاع کر رہے ہیں تو میں آرڈر جاری کر دوں گا، آپ نے ایک پوزیشن لے لی ہے، اب آپ اپنے آرڈر کا دفاع کریں، الیکشن کمیشن سومو ٹو پاور کے تحت یہ اختیار استعمال نہیں کر سکتا، یہ اختیار استعمال کرنے کے لیے آپ کے پاس کوئی درخواست آنی چاہیے تھی، الیکشن کمیشن نے آرڈر کرنے سے پہلے الیکشن ٹریبونل سے ریکارڈ کیسے منگوا لیا؟ آپ نے ریکارڈ واپس منگوا لیا تاکہ ٹریبونل کارروائی آگے نہ بڑھا سکے، یہ رویہ ناقابلِِ برداشت ہے، جس نےدرخواست دی اس کا کام تھا کہ ریکارڈ ساتھ لگاتا، الیکشن کمیشن کو سارا کچھ کرنا ہے، انہوں نے خود کچھ نہیں کرنا، الیکشن کمیشن کے پاس ٹریبونل تبدیلی کا اختیار ہے، لیکن گراؤنڈ کیا ہے؟ الیکشن کمیشن کے پاس سوموٹو کارروائی کا اختیار نہیں ہے۔

چیف جسٹس عامر فاروق نے ایڈیشنل اٹارنی جنرل کو ہدایت کی کہ صرف اس بات کا دفاع کریں جس کا دفاع ہو سکے، سوچ سمجھ کر بحث کیجیے گا، جو ڈیفینڈ کر سکتے ہیں وہی کریں، مجھے ان کے اختیارات کا بھی پتہ ہے اور اپنے اختیارات کا بھی پتہ ہے، پاؤں پر کلہاڑی مارنی ہے تو بتائیں؟ میں ابھی فیصلہ معطل کر کے ریکارڈ واپس منگوا کر ٹریبونل بحال کر دیتا ہوں، جو مقصد حاصل کرنا چاہ رہے ہیں وہ میں نہیں ہونے دوں گا، کیا کیسز ٹریبونل کو ٹرانسفر کر دیے گئے ہیں؟ اسلام آباد کے تینوں حلقوں سے متعلق کارروائی آگے بڑھانے سے روک دیتا ہوں۔

وکیل شعیب شاہین نے استدعا کی کہ عدالت الیکشن کمیشن کا آرڈر معطل کرے۔

چیف جسٹس عامر فاروق نے کہا کہ میں کارروائی آگے بڑھانے سے روک رہا تھا لیکن پھر آرڈر معطل کر دیتا ہوں، اس کا فائدہ تو دوسرے فریقین اٹھا رہے ہیں جنہوں نے جواب جمع نہیں کرایا۔

وکیل شعیب شاہین نے کہا کہ عدالت نے فریقین کو ڈیڑھ ماہ کا وقت دیا لیکن جواب جمع نہیں کرایا گیا، یہ جان بوجھ کر تاخیری حربے استعمال کر رہے ہیں، جواب جمع نہیں کرا رہے لیکن کہہ رہے ہیں کہ جج صاحب متعصب ہو گئے۔

چیف جسٹس عامر فاروق نے کہا کہ جج سے متعلق توہین آمیز زبان استعمال کی گئی، اپنے فائدے کے لیے آپ ایک جج پر ایسے الزام لگا رہے ہیں، اگر یہ الزامات غلط ہوئے تو اس کےنتائج معلوم ہیں رکنِ اسمبلی کو؟ وہ 5 سال کے لیے نا اہل ہوں گے، اگلی سماعت پر انجم عقیل خان خود عدالت میں پیش ہوں، درخواست میں جج کے متعلق nepotism اور favoritism کے الزامات لگائے گئے، اٹارنی جنرل اس کیس میں آئندہ سماعت پر خود پیش ہوں، الیکشن کمیشن بھی کسی اچھے وکیل کو تیاری کے ساتھ پیش کرے، آئندہ سماعت تک نئے الیکشن ٹریبونل کو کارروائی سے روک رہے ہیں۔