فرمان الہی
نماز کے اوقات
پاکستانی معروف سینئر اداکارہ، گلوکارہ و کامیڈین بشریٰ انصاری نے اپنی زندگی کے سب سے بڑے دُکھ اور پچھتاوے سے متعلق بات کی ہے۔
ہر فن مولا فنکارہ بشریٰ انصاری نے نجی ٹی وی کے عید اسپیشل شو میں شرکت کی تھی۔
اس انٹرویو کے دوران اداکارہ نے میزبان وصی شاہ کے متعدد سوالات کے جواب دیے جن میں کچھ دلچسپ تو کچھ سنجیدہ سوال بھی موجود تھے۔
زندگی کے سب سے بڑے دُکھ سے متعلق پوچھے گئے سوال کے جواب میں اداکارہ اپنی بہن سنبل کا ذکر کرتے ہوئے شو کے دوران آبدیدہ ہو گئیں۔
بشریٰ انصاری کا کہنا تھا کہ کچھ بھی ہو جائے میرے ذہن سے یہ دُکھ نہیں جاتا، میرے سامنے کبھی بھی کسی بھی وقت سنبل کا نام لے لیا جائے میں غَم زدہ ہو جاتی ہوں، سنبل شاہد کا چلے جانا کبھی بھی رُلا دیتا ہے۔
اداکارہ نے ایک اور سوال کے جواب میں بتایا کہ میں بہت حقیقت پسند خاتون ہوں، میں ایسی خواہشات ہی نہیں رکھتی ہوں جو کہ پوری نہ ہو سکیں۔
انہوں نے انکشاف کیا مجھے لیجنڈری فنکار ضیاء محی الدین کی جانب سے سراہے جانا کبھی نہیں بھولتا، ضیاء محی الدین کی جانب سے میری گلوکاری کی گئی تعریف مجھے ہمیشہ یاد رہتی ہیں۔
بشریٰ انصاری کا زندگی کے سب سے بڑے پچھتاوے سے متعلق بات کرتے ہوئے بتانا تھا کہ ایک بار لاہور میں میرا ریڈیو اسٹیشن جانا ہوا، میری ملاقات نامور گلوکار و موسیقار، استاد نزر حسین صاحب سے ہوئی، انہوں نے مجھے گانے کی آفر کی مگر میں نے قبول نہیں کی، مجھے یہ پچھتاوا ہے، مجھے وہ پیشکش قبول کر لینی چاہیے تھی۔
