اسرائیل سے انتقام لینے کے حق سے کسی صورت دستبردار نہیں ہوں گے، ایران کے نگراں وزیر خارجہ

ایران کے نگراں وزیر خارجہ علی باقری نے اقوام متحدہ کے سیکریٹری جنرل سے فون پر رابطہ کیا اور کہا ہے کہ اسرائیل سے انتقام لینے کے حق سے کسی صورت دستبردار نہیں ہوں گے۔

نگراں وزیر خارجہ علی باقری کا کہنا ہے کہ اسماعیل ہنیہ کو شہید اور ایران کی قومی سلامتی پر حملہ کیا گیا، اسرائیل نے علاقائی استحکام کی خلاف ورزی کی۔

ایرانی وزیر خارجہ نے کہا کہ اسرائیل نے علاقائی اور عالمی امن و استحکام کو خطرے سے دوچار کیا ہے، ایران حق دفاع سے کسی صورت پیچھے نہیں ہٹے گا۔

اسماعیل ہنیہ کو اسرائیلی خفیہ ایجنسی نے ایرانی ایجنٹوں کے ذریعے قتل کرایا، برطانوی میڈیا

برطانوی میڈیا نے کہا ہے کہ حماس کے سیاسی رہنما اسماعیل ہنیہ کو اسرائیلی خفیہ ایجنسی نے ایرانی ایجنٹوں کے ذریعے قتل کرایا۔

علی باقری کا کہنا ہے کہ مجرم صیہونیوں کو متناسب سزا دینے کا حق نہیں چھوڑیں گے، امن و استحکام کے لیے عالمی برادری اسرائیل کے خلاف کھڑی ہو۔

انہوں نے کہا کہ عالمی برادری غزہ میں جرائم روکنے کے لیے اسرائیل پر دباؤ ڈالے۔

واضح رہے کہ 31 جولائی کو فلسطین کی مزاحمتی تنظیم حماس کے سیاسی سربراہ اسماعیل ہنیہ ایران کے دارالحکومت تہران میں اسرائیلی حملے میں شہید ہوگئے تھے۔

وہ ایرانی صدر کی تقریب حلف برداری میں شرکت کے لیے ایران گئے تھے۔