9 مئی کا ماسٹر مائنڈ کمال ڈھٹائی اور بے شرمی سے مشروط معافی مانگ رہا ہے، عظمیٰ بخاری

08 اگست ، 2024

وزیرِ اطلاعات پنجاب عظمیٰ بخاری نے کہا ہے کہ 9 مئی کا ماسٹر مائنڈ کمال ڈھٹائی اور بے شرمی سے مشروط معافی مانگ رہا ہے، ایک طرف بانی پاکستان کا گھر جلاتے ہو دوسری طرف معافی بھی مشروط مانگتے ہو۔

عمران خان کی مشروط معافی کے بیان پر ردعمل دیتے ہوئے عظمیٰ بخاری نے کہا کہ ایک سال باقاعدہ لوگوں کی ذہن سازی کی اور ان کو اشتعال دلایا گیا۔

انہوں نے کہا کہ عمران خان نے خود کہا کہ مجھے دوبارہ گرفتار کیا تو میرے لوگوں کا یہی ردعمل ہو گا، پوری دنیا کے میڈیا نے رپورٹ کیا تحریک انصاف کے لوگوں نے فوجی تنصیبات پر حملے کیے۔

عظمیٰ بخاری کا کہنا ہے کہ بانی پی ٹی آئی نے گرفتاری کے اگلے دن خود اعتراف کیا میری گرفتاری پر لوگوں نے رد عمل دیا، کچھ دن پہلے بھی انہوں نے جی ایچ کیو پر حملے کا بھی اعتراف کیا۔

صوبائی وزیر نے کہا کہ کور کمانڈر ہاؤس میں یاسمین راشد، اعجاز چوہدری اور محمود رشید کی قیادت میں حملہ ہوا، حسان نیازی نے کور کمانڈر کا یونیفارم لہرایا اور پھر جلایا، کور کمانڈر ہاؤس پر حملے کے وقت علیمہ خان، عظمیٰ خان اور رانی خان وہاں موجود تھیں۔

ان کا کہنا ہے کہ فوجی تنصیبات اور حساس ادارے کے دفاتر پر حملوں کی ویڈیو ثبوت موجود ہے، تحریک انصاف کے لوگوں کے حملے کی ویڈیو ایک دو نہیں سینکڑوں موجود ہیں، کل تک جو شخص کہتا تھا کسی کو این آر او نہیں دوں گا آج وہ رحم کی اپیل کر رہا ہے۔

عظمیٰ بخاری نے یہ بھی کہا کہ تمہارے مگرمچھ کے آنسو اور بناوٹی معافیاں تمہارے منہ پر واپس ماری جا رہی ہیں، مشروط معافی تو عدالتیں قبول نہیں کرتیں، پاکستان کے عوام کیسے قبول کر لیں؟ وہ اب ناک سے لکیریں بھی نکالیں گے تو ان کے دامن پر لگے دھبے صاف نہیں ہو سکتے، کرنل شیر خان اور ایم ایم عالم کی بہادری کی مثالیں دشمن بھارت دیتا ہے، انہوں نے ان کے مجسمے جلائے۔

قومی خبریں سے مزید