شہزادی شیخہ مہرہ نے ’طلاق‘ پرفیوم متعارف کروا دیا

10 ستمبر ، 2024

متحدہ عرب امارات کے نائب صدر اور وزیرِ اعظم شیخ محمد بن راشد المکتوم کی صاحبزادی شیخہ مہرہ المکتوم نے طلاق کے بعد ’طلاق‘ کے نام سے پرفیوم متعارف کروا دیا۔

غیر ملکی میڈیا کی رپورٹس کے مطابق 30 سالہ شہزادی شیخہ مہرہ المکتوم نے فوٹو اینڈ ویڈیو شیئرنگ پلیٹ فارم انسٹاگرام پر اپنے نئے پرفیوم کی لانچ کا اعلان کیا ہے۔

انہوں نے اپنے برانڈ مہرہ ایم 1 کے تحت اس پرفیوم کو متعارف کروایا ہے۔

سوشل میڈیا پر متحرک رہنے والی اور انسٹاگرام پر 9.8 لاکھ فالوورز رکھنے والی شہزادی نے اپنے پرفیوم کی لانچ سے قبل اس حوالے سے ابتداً ایک ویڈیو جاری کی تھی۔

مذکورہ ویڈیو میں ٹوٹے ہوئے شیشے، کالی پنکھڑیاں اور ایک بلیک پینتھر کا ایک مونٹیج دکھایا گیا تھا، اس کے ساتھ ہی انہوں نے اپنے پرفیوم کی بوتل کی رونمائی بھی کر دی، جو سیاہ رنگ کی ہے اور اس پر اس کا نام ’ڈائیوورس‘ کندہ ہے۔

خیال رہے کہ انہوں نے انسٹا گرام پر اپنے شوہر کو طلاق دینے کا اعلان کرنے کے چند ہفتوں بعد اس پرفیوم کا لانچ کیا ہے۔