آئینی ترمیم کا جلد انصاف کی فراہمی سے تعلق نہیں، مقصد کچھ اور ہے: سابق جج شاہد جمیل

لاہور ہائی کورٹ کے سابق جج شاہد جمیل کا کہنا ہے کہ آئینی ترمیم کا جلد انصاف کی فراہمی سے تعلق نہیں، اس کا مقصد کچھ اور ہے۔

ایسوی ایشن آف انٹرنیشنل لائرز گلوبل کے زیرِ اہتمام لندن میں ہونے والی کانفرنس میں خطاب کرتے ہوئے شاہد جمیل نے کہا کہ نئی آئینی ترمیم سے سپریم کورٹ کے اختیارات کم ہوں گے۔

انہوں نے کہا کہ آئینی ترمیم سے عدلیہ کی آزادی پر سمجھوتہ ہو گا، کاش اسی طرح جلد انصاف کی فراہمی کے لیے بھی یہ مل کر بیٹھیں۔

لاہور ہائیکورٹ کے سابق چیف جسٹس پر سابق جج شاہد جمیل کے سنگین الزامات

شاہد جمیل نے کہا کہ جسٹس امیر بھٹی کے داماد نے وزارت ملنے کے بعد گھر کھانے پر بلایا لیکن میں نہیں گیا،

کانفرنس میں عدلیہ کی آزادی اور منصفانہ ٹرائل کے موضوع پر خطاب کرتے ہوئے اسلام آباد ہائی کورٹ کے جج جسٹس طارق محمود جہانگیری نے کہا کہ وکلاء کی انٹرنیشنل کانفرنس کا انعقاد خوش آئند ہے، ایسی کانفرنسوں کے ذریعے ایک دوسرے سے سیکھنے کا موقع ملتا ہے۔

جسٹس طارق محمود جہانگیری کا کہنا ہے کہ جج حقائق کی بنیاد پر فیصلے کرتے ہیں، سپریم کورٹ اپنی خود مختاری کے لیے کھڑی ہے۔

انہوں نے کہا کہ جلد انصاف کی فراہمی کے لیے جدید ٹیکنالوجی کا استعمال کیا جا رہا ہے، انصاف کی فراہمی میں کئی مسائل درپیش ہیں۔

اسلام آباد ہائی کورٹ کے جج کا کہنا ہے کہ سپریم کورٹ کی غیر جانبداری اس کے فیصلوں سے نظر آئے گی۔

کانفرنس میں جج محمد طاہر سمیت پاکستان سے آئے وکلاء ایسوی ایشن کے ارکان بھی شریک تھے۔