بشریٰ بی بی کی ضمانت منسوخی کی درخواست نمٹا دی گئی

اویس یوسفزئی

شبیر ڈار

تازہ ترین

قومی خبریں

12 دسمبر ، 2024

بانئ پی ٹی آئی کی اہلیہ بشریٰ بی بی کی ضمانت منسوخی کی درخواست نمٹا دی گئی۔

بشریٰ بی بی کی ضمانت منسوخی کی درخواست پر اسلام آباد ہائی کورٹ کے جج جسٹس میاں گل حسن اورنگزیب نے کی۔

اسلام آباد ہائی کورٹ نے کہا کہ ضمانت کی رعایت کا ملزم غلط استعمال کرے تو ٹرائل کورٹ بھی ضمانت منسوخ کر سکتی ہے۔

یہ بھی پڑھیے

دورانِ سماعت ایف آئی اے نے کہا کہ بشریٰ بی بی ضمانت ملنے کے بعد ٹرائل کورٹ میں متعدد سماعتوں پر پیش نہیں ہوئیں، وہ ضمانت کی رعایت کا غلط استعمال کر رہی ہیں، ان کی ضمانت منسوخ کی جائے۔

جسٹس میاں گل حسن اورنگزیب نے کہا کہ بشریٰ بی بی آپ کے کنٹرول میں نہیں؟ ان کے کیسز کو سنجیدہ لینا چاہیے۔

بشریٰ بی بی کے وکیل بیرسٹر سلمان صفدر نے کہا کہ بشریٰ بی بی یہاں کمرۂ عدالت میں موجود ہیں۔

عدالت نے کہا کہ اگر وہ ٹرائل کورٹ میں پیش نہیں ہوں گی تو ضمانت منسوخی ہی دائر ہو گی۔

وکیل بیرسٹر سلمان صفدر نے کہا کہ ٹرائل جلد بازی میں چلایا جا رہا ہے، پہلے بھی ٹرائل اسی طرح چلائے گئے تھے۔

عدالت نے سوال کیا کہ ضمانت ملنے کے بعد کتنی سماعتیں ہوئیں جن میں بشریٰ بی بی پیش نہیں ہوئیں؟

وکیل بیرسٹر سلمان صفدر نے کہا کہ ہفتے میں 3 سماعتوں کا ٹرینڈ چل رہا ہے، 23 اکتوبر سے اب تک 15 تاریخیں ہو چکی ہیں، 26 اکتوبر کو جج صاحب چھٹی پر تھے اس لیے سماعت نہیں ہوئی، کیس کی سماعت 29 اکتوبر کو ہوئی جس میں بشریٰ بی بی پیش نہیں ہوئیں، 29 اکتوبر کو ان کی حاضری سے استثنیٰ کی درخواست دائر کی گئی، 5 نومبر کو بشریٰ بی بی پیش نہ ہوئیں اور استثنیٰ کی درخواست دی گئی، 8 نومبر کو بشریٰ بی بی عدالت کے سامنے پیش ہوئیں، 12 نومبر کو سماعت نہیں ہوئی 14 نومبر کو ان کو استثنیٰ ملا، 24 نومبر کو بشریٰ بی بی کے خلاف 25 مقدمات درج ہوئے، بشریٰ بی بی حفاظتی ضمانت کے لیے پشاور ہائی کورٹ میں پیش ہوئیں، 5 دسمبر کو پہلی مرتبہ بشریٰ بی بی کے وارنٹِ گرفتاری جاری ہوئے۔

اسلام آباد ہائی کورٹ نے کہا کہ اگر بشریٰ بی بی ٹرائل کورٹ میں پیش نہیں ہوتیں تو جج ضمانت واپس لے سکتا ہے، یہ ہائی کورٹ کی توہین نہیں ٹرائل کورٹ جج کے پاس اختیار ہے۔