• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ہمدرد میڈیکل کالج کی جانب سے فہرست کے برعکس داخلے دینے کا انکشاف

آج کا اخبار
اہم خبریں
05 فروری ، 2025
کراچی( سید محمد عسکری ) کراچی کے ایک اور پرائیویٹ میڈیکل اینڈ ڈینٹل کالج کی جانب سے مرکزی داخلہ فہرست کے برعکس من پسند داخلے کا انکشاف ہوا ہے جس کا لیاقت میڈیکل یونیورسٹی آف ہیلتھ سائنسز جامشورو نے نوٹس لیتے ہوئے ہمدرد یونیورسٹی کے میڈیکل اینڈ ڈینٹل کالج کے پرنسپل کو خط لکھ دیا ہے۔ خط میں کہا گیا ہے کہ ہمیں متعدد طالب علموں کی طرف سے آپ کے ادارے میں بغیر کسی معقول وجہ کے داخلے سے انکار کی بہت سی شکایات موصول ہوئی ہیں۔ جب کہ پی ایم اینڈ ڈی سی کے ضوابط کے مطابق، حکومت سندھ نے لیاقت یونیورسٹی آف میڈیکل اینڈ ہیلتھ سائنسز، جامشورو کو صوبہ سندھ میں سرکاری اور پرائیویٹ دونوں شعبوں کی میڈیکل اور ڈینٹل یونیورسٹیوں/کالجوں میں داخلہ کا عمل کرنے کا اختیار دیا ہے۔ خط میں کہا گیا ہے کہ پی ایم اینڈ ڈی سی ریگولیشن کی تعمیل میں، ہم نے داخلہ پورٹل کھولا، داخلہ کا عمل کیا، اور امیدوار کی میرٹ اور پسند کی ترجیح کی بنیاد پر انتخابی فہرستوں کو حتمی شکل دی۔ اس کے بعد یہ فہرستیں متعلقہ کالجوں ہمدرد کالج کو مزید داخلہ کی کارروائی کے لیے بھیج دی لیکن ہمیں آپ کے کالج کی طرف سے داخلوں سے انکار کے حوالے سے بہت سی شکایات موصول ہوئی ہیں، یہ ریگولیشن 2023 باب-II داخلوں، "رول نمبر 05 پرائیویٹ کالجوں کے لیے داخلہ کا عمل" میں واضح طور پر درج ہے کہ کونسل کے ذریعے تسلیم شدہ پرائیویٹ کالجوں میں داخلے داخلہ لینے والی یونیورسٹی کی طرف سے ظاہر کردہ میرٹ لسٹ میں سے ہر ایک پرائیویٹ کالج کے ذریعے کروایا اور مکمل کیا جائے۔ تاہم، داخلے سے انکار پاکستان میڈیکل اینڈ ڈینٹل کونسل ایکٹ کی سراسر خلاف ورزی ہے۔ خط میں مزید کہا گیا ہے کہ آپ کو ہدایت دی جاتی ہے کہ منتخب امیدواروں کو داخلے کی اجازت دیں، جو یونیورسٹی کی طرف سے شیئر کی گئی ہے۔ اگر آپ کا کالج اس یونیورسٹی کی فراہم کردہ فہرست سے باہر داخلے کی اجازت دیتا ہے، تو داخلے اور PM&DC رجسٹریشن کے لیے غور نہیں کیا جائے گا اور اس یونیورسٹی کے پاس اس کے علاوہ کوئی آپشن نہیں ہوگا کہ وہ آپ کے کالج کے خلاف ضروری قانونی کارروائی کرنے کے لیے PM&DC اور دیگر متعلقہ حکام کو اس کی اطلاع دے۔
اہم خبریں سے مزید