فرمان الہی
نماز کے اوقات
قومی ٹیم کے آل راؤنڈر سلمان علی آغا کا کہنا ہے کہ بھارت سے ہار کر اگر ہم چیمپئنز ٹرافی جیت جاتے ہیں تو زیادہ بڑی بات ہے، کوشش کریں گے یہ میچ جیتیں اور ہم بھی اچھی پرفارمنس دیں۔
پی سی بی کے پوڈ کاسٹ میں سلمان بٹ کے ساتھ گفتگو کرتے ہوئے سلمان علی آغا نے کہا کہ اگر ہم بھارت کے خلاف جیت جاتے ہیں اور چیمپئنز ٹرافی نہیں جیتتے تو پھر اس میچ کے جیتنے کا کوئی فائدہ نہیں۔
انہوں نے کہا کہ پاک بھارت میچ کا الگ ہی ماحول ہوتا ہے، اسے سب سے بڑا میچ قرار دیا جاتا ہے، چیمپئنز ٹرافی جیتنا زیادہ اہم ہے۔
سلمان علی آغا کا کہنا ہے کہ چیمپئینز ٹرافی کے لیے پُرجوش ہیں، پاکستان ٹیم میں پوٹینشل ہے، ہم چیمپئنز ٹرافی جیت سکتے ہیں۔
قومی ٹیم کے نائب کپتان نے کہا کہ میں کرکٹ سے بہت لطف اندوز ہو رہا ہوں، تین چار سال سے قومی ٹیم کے ساتھ ہوں، مجھے جو نیا رول دیا ہے اسے انجوائے کر رہا ہوں۔
ان کا کہنا ہے کہ چیلنجنگ رول ہے کوشش ہے کہ اچھی پرفارمنس سے اس کو ساتھ لے کر چلوں، نائب کپتان ہونا ایک ذمے داری بھی ہے اور تھوڑی آزادی بھی محسوس ہوتی ہے، آسٹریلیا اور جنوبی افریقا میں جیت سے بہت اعتماد ملا تھا۔
سلمان علی آغا نے مزید کہا کہ میں میچ سے ایک روز پہلے اپنی تمام تیاری مکمل کر لیتا ہوں، سعود شکیل میچ سے قبل جو اپنا پراسیس مکمل کرتے ہیں کوئی اور نہیں کرتا، وہ ڈنر کر کے 9 بجے سو جائیں گے اور صبح 6 بجے ناشتہ کر لیتے ہیں، ہم ناشتے کے لیے جاتے ہیں تو وہ ٹیم بس کی طرف جا رہے ہوتے ہیں۔
انہوں نے یہ بھی کہا کہ ڈومیسٹک کرکٹ تسلسل کے ساتھ کھیلا اور پرفارم کیا ہو تو پھر انٹرنیشنل لیول پر آسانی ہوتی ہے، کرکٹ فینز بہت پُرجوش ہیں، میں بھی یہ سوچتا ہوں کہ لاہور سے میرا تعلق ہے اور لاہور میں ہی ہم چیمپئنز ٹرافی اٹھائیں، اگر ایسا ہوتا ہے کہ تو اس سے اچھا اور کچھ نہیں ہو سکتا۔
