فرمان الہی
نماز کے اوقات
کراچی کے علاقے منظور کالونی کے گھر میں آتشزدگی کا واقعہ گھر کے مالک کی خود سوزی کا نتیجہ نکلا۔
بلوچ کالونی پولیس کے مطابق گھر کے مالک نے حالات سے دلبرداشتہ ہو کر خود کو آگ لگائی جس سے گھر کو بھی نقصان پہنچا۔
ایس ایچ او بلوچ کالونی مظہر کانگو کے مطابق منظور کالونی میں عیدگاہ چوک پر گزشتہ روز گھر میں آگ لگنے سے 67 سالہ ظفر لئیق جاں بحق ہو گیا تھا جبکہ 17 سالہ اعظم جھلس کر زخمی ہوا تھا۔
پولیس کے مطابق حالات و واقعات کی جانچ پڑتال کے بعد پتہ چلا ہے کہ 67 سالہ ظفر نے گھریلو حالات سے دل برداشتہ ہو کر کیمیکل چھڑک کر مبینہ طور پر خود کو آگ لگائی۔
پولیس کے مطابق آتشزدگی کے دوران اسے بچانے کی کوشش میں اس کا سوتیلا بیٹا اعظم زخمی ہوا تھا۔
پولیس کے مطابق متوفی نے 7 سال قبل بیوہ عورت سے شادی کی تھی، پہلے شوہر سے خاتون کے 2 بیٹے اور ایک بیٹی بھی ساتھ ہی رہتے تھے۔
اہلِ خانہ نے بیان دیا ہے کہ ظفر لئیق چھوٹی موٹی انویسٹمنٹ کر کے گھر چلا رہا تھا لیکن کئی ماہ سے مالی حالات خراب ہو گئے تھے جس کی بنا پر گزشتہ 10 ماہ سے انہوں نے گھر کا کرایہ بھی ادا نہیں کیا تھا اور پھر بجلی کا بل 1 لاکھ 75 ہزار روپے آ گیا تھا۔
پولیس کے مطابق گھریلو حالات خراب ہونے کی وجہ سے راشن لانے میں بھی مشکل پیش آ رہی تھی، واقعے کے روز خاتون نے شوہر سے پکانے کے لیے سودا سلف لانے کا کہا تو دونوں کے درمیان تلخ کلامی ہو گئی اور ظفر نے کمرہ بند کر لیا۔
پولیس کے مطابق کچھ دیر بعد کمرے سے آگ نکلتی محسوس ہوئی جس کے بعد دروازہ توڑ کر دیکھا تو ظفر جل چکا تھا۔
بیوہ خاتون کے مطابق سوتیلے باپ کو بچانے کے لیے 17 سالہ اعظم نے کوشش کی تو وہ زخمی ہو گیا۔
پولیس کے مطابق میت لواحقین کے حوالے کر دی گئی ہے جبکہ واقعے کی مزید چھان بین جاری ہے۔
