فرمان الہی
نماز کے اوقات
بھارتی وزیرِ اعظم نریندر مودی نے بنگلادیش کے عبوری رہنما محمد یونس سے ملاقات کی ہے۔
دونوں رہنماؤں کے درمیان ملاقات تھائی لینڈ میں علاقائی سربراہی اجلاس کے موقع پر ہوئی۔
بنگلادیش میں شیخ حسینہ کا اقتدار ختم ہونے کے بعد محمد یونس کی نریندر مودی سے یہ پہلی ملاقات ہے۔
ملاقات میں وزیرِ خارجہ ایس جے شنکر اور قومی سلامتی کے مشیر اجیت ڈوول بھی موجود تھے۔
بھارتی خارجہ سیکریٹری وکرم مسری کے مطابق وزیرِاعظم مودی نے ملاقات میں بنگلا دیش میں اقلیتوں، خصوصاً ہندو برادری کی سلامتی اور تحفظ سے متعلق تشویش کا اظہار کیا۔
انہوں نے مطالبہ کیا کہ اقلیتوں پر ہونے والے تمام حملوں کی مکمل اور منصفانہ تحقیقات کی جائیں۔
مودی نے اس بات پر زور دیا کہ بھارت بنگلا دیش کے ساتھ جمہوری، پائیدار، پرامن تعلقات چاہتا ہے، ہمارا رویہ عوام پر مرکوز ہونا چاہیے، جو دونوں ملکوں کے عوام کو براہِ راست فائدہ پہنچائے۔
انہوں نے بنگلا دیشی قیادت کو یہ مشورہ بھی دیا کہ ایسی تقاریر اور بیانات سے گریز کیا جائے جو ماحول کو خراب کریں۔
سرحدی سیکیورٹی اور غیر قانونی نقل و حرکت پر تشویش کا اظہار کرتے ہوئے مودی نے سرحدی قوانین کے سخت نفاذ اور خاص طور پر رات کے وقت غیر قانونی سرحدی نقل و حرکت کی روک تھام پر زور دیا تاکہ دونوں ممالک کے درمیان امن قائم رہے۔
