فرمان الہی
نماز کے اوقات
یورپی یونین، بیلجیئم اور لکسمبرگ میں پاکستان کے سفیر رحیم حیات قریشی نے برسلز میں پاکستانی سفارت خانے میں منعقدہ ایک تقریب میں پاکستانی مسیحی برادری کے ممتاز افراد کے ساتھ ایسٹر کا جشن منایا۔
اس تقریب میں بیلجیئم بھر سے گرجا گھروں میں اہم عہدوں پر فائز نمایاں افراد شریک ہوئے۔
سفیرِ پاکستان رحیم حیات قریشی نے بین المذاہب ہم آہنگی کے فروغ اور بیلجیئم کے معاشرے میں بین الثقافتی تفہیم کے فروغ میں ان کے قابلِ قدر کردار کو سراہا۔
اپنے خطاب میں سفیر نے آئینِ پاکستان میں درج اقلیتوں کے حقوق کے تحفظ کے لیے حکومتِ پاکستان کے پختہ عزم پر زور دیا۔
انہوں نے پاکستان کی مساوات، مذہبی آزادی اور قانون کی حکمرانی کے اصولوں پر مبنی وابستگی کا اعادہ کیا۔
سفیرِ پاکستان نے بیرونِ ملک پاکستانی کمیونٹی کی مثبت شبیہ پر فخر کا اظہار کیا جو اپنی سماجی شمولیت اور سماجی ہم آہنگی کو فروغ دینے کی کوششوں کے ذریعے قائم کی گئی ہے۔
انہوں نے مختلف ثقافتوں کے درمیان پل کا کردار ادا کرنے اور پاکستان کی شمولیت اور برداشت کی حقیقی اقدار کو اُجاگر کرنے کی ترغیب دی۔
اس موقع پر سفیرِ پاکستان نے پوپ فرانسس کے انتقال پر گہرے رنج و غم کا اظہار کیا۔
انہوں نے کہا کہ ہم پوپ فرانسس کے انتقال پر غمزدہ ہیں، وہ امن، محبت اور بین المذاہب ہم آہنگی کی ایک روشن علامت تھے، ان کی قیادت نے دنیا بھر میں اربوں لوگوں کو ناصرف کیتھولک چرچ میں بلکہ ہر اس جگہ جہاں ہمدردی اور کمزور طبقوں کی حمایت کی ضرورت تھی متاثر کیا۔
تقریب کے تمام شرکاء نے پوپ فرانسس کی یاد میں 1 منٹ کی خاموشی اختیار کی تاکہ ان کی لازوال میراث کو خراجِ عقیدت پیش کیا جا سکے۔
یہ تقریب امن، باہمی احترام اور بقائے باہمی کی مشترکہ اقدار کے اعادے کے ساتھ اختتام پزیر ہوئی۔
