فرمان الہی
نماز کے اوقات
برطانوی پولیس نے انکشافات کیا ہے کہ2021ء سے اب تک معذور افراد کو دی جانے والی ٹیکس دہندگان کی فنڈ سے حاصل شدہ ہزاروں گاڑیاں مختلف جرائم میں استعمال ہو چکی ہیں۔
رپورٹ کے مطابق پولیس فورسز نے 6 ہزار سے زائد موٹیبلیٹی گاڑیاں ضبط کیں جن کا تعلق ڈرَنک ڈرائیونگ، چوری اور دیگر مجرمانہ سرگرمیوں سے تھا۔
یہ گاڑیاں موٹیبلیٹی اسکیم کے تحت معذور افراد کو رعایتی بنیادوں پر لیز پر دی جاتی ہیں تاکہ وہ نقل و حرکت میں آسانی حاصل کر سکیں۔
حکام کا کہنا ہے کہ اکثریت مستحق افراد قانون کی پاسداری کرتے ہیں تاہم کچھ کیسز میں گاڑیوں کا غلط استعمال سامنے آیا ہے جس پر نگرانی کے نظام کو مزید سخت کرنے کی ضرورت پر زور دیا جا رہا ہے۔
موٹیبلیٹی اسکیم کے منتظمین کا کہنا ہے کہ وہ قانون نافذ کرنے والے اداروں کے ساتھ تعاون کرتے ہیں اور جہاں بھی غلط استعمال ثابت ہو، مناسب کارروائی کی جاتی ہے جس میں گاڑی کی ضبطگی اور اسکیم سے اخراج شامل ہو سکتا ہے۔
اس انکشاف کے بعد اپوزیشن جماعتوں کی جانب سے حکومتی نگرانی کے نظام پر سوالات اٹھائے جا رہے ہیں جبکہ حکومت کا مؤقف ہے کہ اسکیم لاکھوں معذور افراد کے لیے ناگزیر سہولت فراہم کر رہی ہے اور چند واقعات کی بنیاد پر پوری اسکیم کو متنازع نہیں بنایا جانا چاہیے۔
