• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ریاستی طاقت کے استعمال کے نتائج اچھے نہیں ہوں گے، قادر مگسی

آج کا اخبار
ملک بھر سے
28 اپریل ، 2025
حیدرآباد (بیورو رپورٹ) سندھ ترقی پسند پارٹی کے چیئرمین ڈاکٹر قادر مگسی نے سندھ کے مختلف شہروں میں نہروں اور کارپوریٹ فارمنگ کے خلاف احتجاجی دھرنوں پر پولیس کے چڑھائی اور تشدد کی مذمت کرتے ہوئے کہا ہے کہاگر ریاستی طاقت کا استعمال کیا گیا تو اس کے نتائج اچھے نہیں ہوں گے‘ حکمرانوں کو اگر احتجاج ختم کرانا ہے تو اس کا ایک ہی راستہ ہے کہ وہ سندھ دشمن منصوبے ختم کریں۔ سندھ حکومت پرامن احتجاجوں پر حملے کراکے آمریت کے دور کو دہرا رہی ہے‘ سندھ میں گزشتہ آٹھ ماہ سے جاری احتجاجی تحریک پرامن رہی ہے‘ اس دوران نہ کہیں کوئی نقصان ہوا ہے‘ نہ کسی کو پتھر لگا ہے اور نہ کسی گاڑی کا شیشہ ٹوٹا ہے مگر پرامن احتجاج کو طاقت کے ذریعے ختم کرنے کی ناکام کوشش کی جا رہی ہے۔ انہوں نے کہا کہ حکمران ہوش سے کام لیں‘ ان کے ان ہتھکنڈوں سے تحریک دبائی نہیں جاسکتی۔ انہوں نے کہا کہ پیپلز پارٹی کی طرف سے جشن منانے کا ڈھونگ سندھ حکومت کی پولیس کی ان پرتشدد کارروائیوں سے ظاہر ہوتا ہے۔ پیپلز پارٹی بوکھلاہٹ کا شکار ہوچکی ہے‘ ان آمریت زدہ اقدامات سے سندھ کو خاموش نہیں کرایا جا سکتا۔ سندھ اپنی بقاءکے لیے دریائے سندھ پر نہروں اور کارپوریٹ فارمنگ کے خلاف احتجاج جاری رکھے گی‘ اب یہ تحریک سندھ کی ہر گلی کوچے تک پہنچ چکی ہے‘ عوام حوصلے کے ساتھ اپنا پرامن احتجاج جاری رکھیں‘ آخر کار حکمرانوں کو ناکامی کا سامنا کرنا پڑے گا۔
ملک بھر سے سے مزید