فرمان الہی
نماز کے اوقات
اسرائیلی فوج نے غزہ میں فضائی حملے کے دوران کم عمر میڈیا ورکر اور رضاکار بچی یقین حماد کو شہید کر دیا۔
فلسطینی میڈیا کے مطابق غزہ کی کم عمر میڈیا رضاکار اور مقامی فلاحی تنظیم کی سب سے کم عمر رضا کار 11 سالہ یقین حماد اسرائیلی فضائی حملے میں شہید ہو گئی۔
فلسطینی میڈیا کا کہنا ہے کہ یقین ناصرف معصوم بچی تھی بلکہ جنگ زدہ بچوں کے لیے امید کی علامت بن چکی تھی۔
رپورٹ کے مطابق شہید یقین حماد نے محاصرے کے شکار غزہ میں رہتے ہوئے سوشل میڈیا کے ذریعے ہزاروں افراد تک اپنی آواز پہنچائی۔
یقین کی ویڈیوز میں کبھی یتیم اور بے گھر بچوں کے لیے امدادی سرگرمیوں کی جھلک دکھائی دیتی، تو کبھی وہ بچوں میں تحائف بانٹتے ہوئے ہنستی مسکراتی نظر آتی تھی۔
یقین حماد کا واضح پیغام تھا کہ خوف اور تباہی کے باوجود زندگی اور امید کو زندہ رکھنا، تاہم جمعے کی رات دیر البلح کے علاقے میں ایک اسرائیلی فضائی حملے نے اس کی زندگی کا چراغ گل کر دیا۔
حملے میں شہید یقین کے گھر کو نشانہ بنایا گیا اور وہ ملبے تلے دب کر شہید ہو گئی۔
اسرائیلی فوج کے حملے میں شہید ہونے والی 11 سالہ یقین اکثر اپنے بڑے بھائی محمد حماد کے ہمراہ امدادی مہمات میں شریک ہوتی تھی، جہاں وہ غزہ کے متاثرہ خاندانوں میں خوراک، کپڑے اور کھلونے تقسیم کرتے تھے۔
یقین کی شہادت پر غزہ اور سوشل میڈیا پر شدید غم و غصے کا اظہار کیا گیا۔
صحافیوں، انسانی حقوق کے کارکنوں اور ان کے چاہنے والوں نے ایک ایسی بچی کو خراجِ عقیدت پیش کیا جو اپنی کمسنی کے باوجود ایک بڑا پیغام دے رہی تھی۔
غزہ کی وزارتِ صحت کے مطابق اسرائیل کے جاری حملوں میں 7 اکتوبر 2023إ کے بعد سے اب تک کم از کم 53 ہزار 939 فلسطینی شہید اور 1 لاکھ 22 ہزار 797 زخمی ہو چکے ہیں۔
گورنمنٹ میڈیا آفس نے اپ ڈیٹ شدہ اعداد و شمار جاری کرتے ہوئے شہداء کی تعداد 61 ہزار 700 سے زائد بتائی ہے، جن میں وہ ہزاروں افراد بھی شامل ہیں جو تاحال ملبے تلے دبے ہونے کے باعث مردہ تصور کیے جا رہے ہیں۔
