فرمان الہی
نماز کے اوقات
بھارت کی معروف کاروباری شخصیت اور ارب پتی مکیش امبانی کے بھائی انیل امبانی مشکل میں پھنس گئے، اربوں روپے کی منی لانڈرنگ کے کیس میں عدالت کی اجازت کے بغیر ملک سے باہر نہیں جاسکتے۔
بھارتی میڈیا کے مطابق ریلائنس گروپ کے چیئرمین اور منیجنگ ڈائریکٹر انیل امبانی کے خلاف ای ڈی (انفورسمنٹ ڈائریکٹوریٹ) نے 3,000 کروڑ روپے کے مبینہ قرض فراڈ اور منی لانڈرنگ کیس میں لک آؤٹ سرکلر جاری کر دیا ہے۔
اس نوٹس کے بعد امبانی اب عدالت کی اجازت کے بغیر ملک سے باہر سفر نہیں کر سکتے۔
تحقیقات کے مطابق انیل امبانی سے منسلک کمپنیز نے 2017 سے 2019 کے درمیان بینک سے حاصل کردہ قرض کو غیر قانونی طور پر دوسری کمپنیوں کو منتقل کیا، یہ ایک منظم اسکیم کے تحت کیا گیا، جس کا مقصد عوامی فنڈز کا غلط استعمال اور مالیاتی اداروں کو گمراہ کرنا تھا۔
تحقیقات میں انکشاف ہوا ہے کہ قرض کے اجراء سے پہلے ہی بینک کے پروموٹرز سے جڑی کمپنیوں کو رقم منتقل کی گئی تھی جس سے رشوت اور مفاد پر مبنی لین دین کے شکوک و شبہات پیدا ہوئے ہیں۔
خیال رہے کہ ممبئی میں ریلائنس گروپ کے مختلف دفاتر پر چھاپے مارنے کے بعد بھارتی تحقیقاتی ایجنسی نے انہیں 5 اگست کو پوچھ گچھ کیلئے طلب کرلیا ہے۔
