فرمان الہی
نماز کے اوقات
نیوزی لینڈ کی پولیس نے 2 سالہ زندہ بچی کو سوٹ کیس سے برآمد ہونے پر خاتون مسافر کو بچی سے بدسلوکی کے الزام میں گرفتار کر لیا۔
غیر ملکی میڈیا رپورٹس کے مطابق یہ واقعہ اتوار کو شمالی نیوزی لینڈ میں وانگاری سے آک لینڈ جانے والی بس میں پیش آیا۔
میڈیا رپورٹس کے مطابق سفر کے دوران بس کائیواکا کے ایک بس سٹاپ پر رکی جہاں سے 27 سالہ خاتون مسافر بس میں سوار ہوئی۔
پولیس کے مطابق ڈرائیور کا کہنا ہے کہ دورانِ سفر خاتون نے بس کے نچلے حصے تک رسائی مانگی جہاں سامان رکھا ہوا ہوتا ہے تو اسے خاتون پر شبہ ہوا۔
پولیس کا کہنا ہے کہ ڈرائیور نے جب خاتون کا بیگ ہلتے ہوئے دیکھا تو وہ فکرمند ہو گیا اور سوٹ کیس کھول دیا۔ سوٹ کیس کھولنے پر اس میں 2 سالہ بچی موجود تھی، جس نے صرف ایک ڈائپر پہنا ہوا تھا۔
پولیس کا کہنا ہے کہ بچی تقریباً ایک گھنٹے سے اس بیگ میں بند تھی۔ بچی کی برآمدگی پر اسے اسپتال منتقل کر دیا گیا جہاں اس کا طبی معائنہ کیا گیا ہے، جس کے مطابق اس کا جسم بہت گرم تھا لیکن جسمانی طور پر اسے کوئی نقصان نہیں پہنچا۔
میڈیا رپورٹس کے مطابق خاتون کو بچی سے بدسلوکی کے الزام میں گرفتار کرلیا گیا ہے، مزید تحقیقات کی جا رہی ہیں۔
