فرمان الہی
نماز کے اوقات
میچ ریفری اینڈی پائی کرافٹ کو ایشیاء کپ کے پاکستان کے میچز سے ہٹائے جانے کا امکان ہے۔
ٹیم ذرائع کا کہنا ہے کہ میچ ریفری کو ہٹانے کے بعد پاکستانی ٹیم کل یو اے ای کے خلاف میچ کھیلے گی۔
ایشیا کپ کے حوالے سے حتمی فیصلہ پاکستان کرکٹ بورڈ کے اعلیٰ سطح اجلاس کے بعد ہو گا۔
اس حوالے سے ترجمان پی سی بی کا کہنا ہے کہ پاکستان کرکٹ بورڈ نے ایشیاء کپ کے حوالے سے ابھی تک کوئی حتمی فیصلہ نہیں کیا۔
پی سی بی کے ترجمان کا کہنا ہے کہ مشاورت جاری ہے اور کل تک حتمی فیصلہ کر لیا جائے گا، جو پاکستان کے مفاد کو مدِنظر رکھ کر کیا جائے گا۔
اس سے قبل ذرائع نے دعویٰ کیا تھا کہ اگر پاکستان کا اینڈی پائی کرافٹ کو ہٹانے کا مطالبہ نہ مانا گیا تو پاکستان ٹیم ایشیاء کپ سے دستبردار ہو جائے گی۔
ایشیاء کپ میں پاک بھارت میچ میں پائی کرافٹ نے ضابطۂ اخلاق کی خلاف ورزی کرتے ہوئے ٹاس سے پہلے کپتان سلمان علی آغا سے کہا تھا کہ ٹاس پر ہینڈ شیک نہیں ہو گا۔
ایشیاء کپ کے ٹورنامنٹ ڈائریکٹر اینڈریو رسل نے پاکستانی منیجر کو بتایا تھا کہ ہینڈ شیک نہ کرنے کے حوالے سے بھارتی بورڈ کی ہدایت تھی جس پر ریفری نے عمل درآمد کیا۔
پاکستان اور متحدہ عرب امارات کے درمیان کل (بدھ کو) ہونے والے ایشیاء کپ کے میچ میں ریفری کون ہو گا؟ یہ فیصلہ بھی تاحال نہیں ہو سکا ہے۔
پی سی بی نے آئی سی سی سے باضابطہ طور پر ریفری پائی کرافٹ کو ہٹانے کا مطالبہ کیا تھا، جس پر آئی سی سی کی جانب سے میچ ریفری اینڈی پائی کرافٹ کو ہٹانے کی پاکستان کی درخواست مسترد کیے جانے کی خبر سامنے آئی تھی۔
اسی ضمن میں پاکستانی ٹیم کی میچ سے قبل آج اہم پریس کانفرنس ہونی تھی جو ٹیم نے منسوخ کردی البتہ ٹیم نے معمول کے مطابق ٹریننگ میں حصہ لیا۔
