• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

پرنٹ میڈیا کیلئے اشتہارات کا حجم بڑھایا جائے، APNS سندھ کمیٹی

آج کا اخبار
اہم خبریں
19 ستمبر ، 2025
کراچی (نیوز ڈیسک) پرنٹ میڈیا کیلئے اشتہارات کا حجم بڑھایا جائے، اشتہارات کی ادائیگی میں تاخیر سے پرنٹ میڈیا شدید بحران کا شکار ہے، اجلاس میں اظہار افسوس آل پاکستان نیوز پیپرز سوسائٹی کی سندھ کمیٹی کا اجلاس وائس چیئرمین یونس مہر کی صدارت میں منعقد ہوا۔اجلاس میں اراکین نے پی آئی ڈی کی طرف سے سندھ کے اخبارات کو نظر انداز کرنے اور بروقت ادائیگی میں تاخیر پر تشویش کا اظہار کیا اور مطالبہ کیا کہ پی آئی ڈی کے جاری کردہ اشتہارات کی جلد ادائیگی ممکن بنائی جائے ۔ اراکین نے اس امر پر تشویش کا اظہار کیا کہ محکمہ اطلاعات سندھ کی طرف سے اخبارات و جرائد کو اشتہارات کا اجراء طے شدہ حجم کے برعکس کم ترین سطح پر آگیا ہے جبکہ اشتہارات کے اجراء میں اے پی این ایس رکن مطبوعات کو یکسر نظر انداز کیا جارہا ہے ۔ اجلاس نے مطالبہ کیا کہ پرنٹ میڈیا کیلئے اشتہارات کا حجم بڑھایا جائے تاکہ وہ اپنی اشاعت برقرار رکھ سکیں۔ کمیٹی کے اراکین نے نان بجٹڈ اشتہارات کی ادائیگی کے نظام کو مسترد کرتے ہوئے مطالبہ کیا کہ پرانا نظام بحال کیا جائے اور حسب سابق ان اشتہارات کی ادائیگی ماہانہ بنیاد پر محکمہ اطلاعات سندھ کی طرف سے کی جائے ۔ اجلاس نے اس امر پر افسوس کا اظہار کیا کہ محکمہ اطلاعات سند ھ کی طرف سے جاری کردہ اشتہارات کی ادائیگی میں تاخیر سے پرنٹ میڈیا شدید بحران کا شکار ہے۔ اجلاس نے سرمد علی صدر، اطہر قاضی سیکرٹری جنرل ، یونس مہر وائس چیئرمین ، ممتاز علی پھلپوٹو ، حسینہ جتوئی، قاضی مصطفی ، نجم الدین شیخ اور قاضی امتیاز پر مشتمل کمیٹی تشکیل دی جو اخبارات کو درپیش مسائل پر وزیر اعلیٰ سندھ اور وزیر اطلاعات شرجیل میمن سے ملاقات کرے گی۔ اجلاس میں سرمد علی صدر، اطہر قاضی سیکرٹری جنرل، یونس مہر نائب چیئرمین (روزنامہ ہلچل)، ممتاز علی پھلپوٹو(روزنامہ عوامی پرچار)، علی بن یونس (روزنامہ بیوپار)، خرم حسین (روزنامہ ڈان)، نجم الدین شیخ (روزنامہ دیانت)، قاضی مصطفی (روزنامہ عبرت)، حسینہ جتوئی(روزنامہ مومل)، امتیاز اطہر قاضی (روزنامہ تعمیر سندھ) اور شاہد ساٹی (روزنامہ وطن گجراتی)ارکان نے شرکت کی۔
اہم خبریں سے مزید