فرمان الہی
نماز کے اوقات
بالی ووڈ پر ایک عرصہ راج کرنے والی مرحوم اداکارہ پروین بابی کی بائیوپک سیریز کے لیے ایک نئی ابھرتی اداکارہ کو منتخب کر لیا گیا ہے۔
اداکارہ ترپتی دمری اس وقت فلموں میں مرکزی کردار ادا کر رہی ہیں، ان کے تازہ ترین منصوبے اس بات کا ثبوت ہیں۔
جب ترپتی دمری نے سندیپ ریڈی ونگا کی فلم اینیمل میں ناقابلِ فراموش کیمیو کیا تو اس کردار نے سب پر اس کی چھاپ چھوڑی، چاہے ان کے کردار کے حوالے سے اخلاقی بحث کچھ بھی ہو مگر انہوں نے اس کردار سے بہت خوب کامیابی حاصل کی جس کے بعد انہیں ایک کے بعد ایک فلم میں اہم کرداروں کی پیشکشں ہوئیں۔
گزشتہ برس ترپتی کے لیے مکمل طور پر مرکزی کردار کا سال تھا، جب انہوں نے فلموں میں مرکزی ہیروئن کا کردار نبھایا، چاہے وہ وکی کوشل اور امی وِرک کی فلم ’بیڈ نیوز‘ ہو، راج کمار راؤ کی فلم ’وکی ودیا کا وہ والا ویڈیو‘ ہو یا کارتک آریان کے ساتھ ’بھول بھلیاں 3‘ میں مرکزی کردار ادا کر رہی ہوں، انہوں نے ہر فلم میں اہم کردار کو بڑی خوبی سے نبھایا۔
رواں برس ترپتی دمری نے ’دھڑک 2‘ میں سدھانت چترویدی کے مقابل اداکاری کی، جس کے بعد اب ان کے پاس اس سال مزید کوئی فلم نہیں ہے، لیکن انہوں نے ایک اور بڑا پروجیکٹ حاصل کر لیا ہے جس میں وہ مرکزی کردار ادا کریں گی۔
بھارتی میڈیا کے مطابق اداکارہ ترپتی دمری کو نیٹ فلکس کے لیے مرحوم تجربے کار اداکارہ پروین بابی کی بائیوپک کے لیے منتخب کر لیا گیا ہے جو ایک محدود ایڈیشن سیریز کے طور پر تیار کی جا رہی ہے جس کی ہدایت کار شونالی بوس ہیں، جبکہ فلم کی شوٹنگ مارچ 2026ء تک شروع کی جائے گی۔
4 اپریل 1954ء کو جنم لینے والی بالی ووڈ اداکارہ پروین بابی نے 1970ء اور 1980ءکی دہائیوں میں بالی ووڈ پر راج کیا، وہ اپنی بولڈ، جدید شخصیت اور شہری انداز کی وجہ سے مشہور تھیں اور ہندی سنیما میں ہیروئن کے نئے دور کی نمائندہ سمجھی جاتی تھیں، ان کے کردار پُراعتماد، خودمختار اور نرمی کا حسین امتزاج ہوا کرتے تھے۔
پروین بابی کے کیریئر کی زبردست ہٹ فلموں میں 1977ء کی امر اکبر انتھونی، 1975ء کی دیوار، 1980ء کی شان، 1979ء کی سہاگ، 1979ء کی کالا پتھر، 1982ء کی نمک حلال اور 1974ء کی مجبور جیسی کلاسک فلمیں شامل ہیں جو ہر لحاظ سے ہٹ تھیں۔
پروین بابی 20 جنوری 2005ء کو ممبئی میں واقع اپنے فلیٹ میں مردہ پائی گئی تھیں۔
اب ناقدین اور مداحوں کی نظر ترپتی کی طرف لگی ہے کہ کیا وہ پروین بابی کے کردار کے ساتھ انصاف کر پائیں گی۔
