فرمان الہی
نماز کے اوقات
مشہور امریکی گلوکارہ کیٹی پیری اور کینیڈا کے سابق وزیراعظم جسٹن ٹروڈو کے درمیان مبینہ طور پر رومانس کی خبریں ایک بار پھر سرخیوں میں ہیں۔
برطانوی جریدے ڈیلی میل کے مطابق دونوں کو کیلی فورنیا کے ساحل سانتا باربرا کے قریب ایک یاٹ پر ایک دوسرے کے ساتھ دیکھا گیا۔
رپورٹ کے مطابق 40 سالہ گلوکارہ کیٹی پیری اپنے 24 میٹر لمبے یاٹ کاراول (Caravelle) پر ٹروڈو کے ساتھ موجود تھیں، جہاں دونوں کو ایک دوسرے کو گلے لگاتے دیکھا گیا۔
ان لمحات کی تصاویر ایک وہیل واچنگ کشتی پر موجود سیاحوں نے بنائیں، جو سوشل میڈیا پر تیزی سے وائرل ہوگئیں۔
دونوں کے درمیان قریبی تعلقات کی خبریں اب عالمی میڈیا میں موضوعِ بحث بن گئی ہیں، اگرچہ دونوں کی جانب سے اس مبینہ رشتے پر تاحال کوئی باضابطہ بیان جاری نہیں کیا گیا ہے۔
یاد رہے کہ کیٹی پیری اور جسٹن ٹروڈو کے درمیان تعلقات کی افواہیں گردش کر رہی تھیں، جب دونوں کو مونٹریال کے ایک معروف ریسٹورنٹ میں ڈنر کرتے ہوئے دیکھا گیا تھا، اس وقت کیٹی پیری اپنی Lifetimes ورلڈ ٹور کے دوران کینیڈا میں تھیں۔
پیری نے تقریباً تین ماہ قبل اداکار اور ساتھی اورلینڈو بلوم سے اپنی علیحدگی کی تصدیق کی تھی۔ دونوں کی ایک بیٹی بھی ہے۔
دوسری جانب جسٹن ٹروڈو، جو ایک دہائی تک کینیڈا کے وزیراعظم رہے، انہوں نے اگست 2023 میں اپنی اہلیہ صوفی سے 18 سالہ ازدواجی زندگی کے بعد علیحدگی اختیار کی تھی، اُن کے دو بیٹے اور ایک بیٹی ہے۔
