فرمان الہی
نماز کے اوقات
جنوبی بھارت کے اسٹار اداکار روی تیجا سے ملنے کی کوشش کرنے والے مداح کو گارڈز نے گھسیٹ کر دور کردیا۔
جنوبی بھارت کے شہر حیدر آباد میں تیلگو فلم ماس جاتھارا کی ریلیز سے قبل ہونے والی تقریب کے موقع پر ایک مداح کو اس وقت پکڑ کر گھسیٹا اور دور لے گئے جب وہ روی تیجا سے ملنے کی کوشش کر رہا تھا۔
واضح رہے کہ اس فلم میں مرکزی کردار 57 سالہ روی تیجا اور 24 سالہ سری لیلا نے ادا کیے ہیں۔ پری ریلیز کی اس تقریب کے مہمانِ خصوصی سوریا تھے، جبکہ فلم کی مکمل کاسٹ، کریو اور مداح بڑی تعداد میں موجود تھے۔
تاہم تقریب کے دوران اس وقت بدمزگی ہوئی جب ایک مداح سیکیورٹی حصار توڑ کر اداکار روی تیجا اور سوریا سے ملنے کے لیے اسٹیج پر پہنچ گیا۔ اس حوالے سے انسٹاگرام پر ایک ویڈیو پوسٹ کی گئی ہے، جس میں سیکیورٹی اہلکاروں کو مداح سے جھگڑتے ہوئے دیکھا جا سکتا ہے۔
سیکیورٹی اہلکار مداح کو زبردستی دور تک گھسیٹتے ہوئے لے جاتے دکھائی دیے۔مداح روی تیجا اور سوریا سے ملنے اور بات کرنے کی کوشش کرتا رہا۔
سوریا اس موقع پر منظر دیکھتے نظر آرہے ہیں، جبکہ روی سیکیورٹی اہلکاروں کو اشارہ کرتے ہیں کہ مداح کو گھسیٹتے ہوئے احتیاط کریں۔ وہ مداح کو پرسکون رہنے کے لیے بھی کہتے نظر آتے ہیں۔
دریں اثنا روی تیجا نے اپنے سیکیورٹی گارڈز سے کہا کہ وہ ان سے ملنے کے لیے آنے والے مداح کو گھسیٹنے میں محتاط طریقہ اختیار کریں۔
اداکار کے سیکیورٹی گارڈز کی جانب سے مداح کو اس طرح گھسیٹ کر دور کرنے پر سوشل میڈیا صارفین نے تنقید کی ہے جبکہ بعض نے سیکیورٹی اقدام کے طور پر ایسا کرنے کو درست قرار دیا ہے۔
