فرمان الہی
نماز کے اوقات
برطانوی وزیر خزانہ (چانسلر) ریچل ریوز نے پارلیمنٹ میں نئے مالیاتی سال کا بجٹ پیش کرتے ہوئے کہا کہ انکم ٹیکس اور نیشل انشورنس کی ادائیگی کیلئے آمدنی کی کم از کم حد کو2031 تک منجمد کر دیا گیا۔
چانسلر کے اس اقدام کا مطلب ہے کہ کم از کم آمدنی کی حد مقرر کرنے سے تنخواہوں میں اضافے سے لوگ خود بخود زائد ٹیکس کے بینڈ میں آجائیں گے، بجٹ کی تفصیلات غلطی سے چانسلر کی تقریر سے کچھ دیر قبل ہی لیک ہوگئی تھیں۔
آفس آف بجٹ رسپانسیبیلٹی نے بجٹ تفصیلات قبل از وقت جاری کرنے کو تیکنکی غلطی قرار دے کر اس کی تحقیقات شروع کرنے کا اعلان کیا، ریچل ریوز کا کہنا تھا کہ این ایچ ایس سے علاج کیلئے انتظار کا وقت، قومی قرضہ اور اخراجات زندگی کو کم کرنے کیلئے ضروری اقدمات کئے ہیں۔
حکومت انرجی بلز میں کمی کیلئے گرین لیویز میں کٹوتی کرے گی، انرجی بلز میں آئندہ برس اپریل سے 150 پاؤنڈ تک کی بچت ہوگی، انھوں نے کہا کہ سیلری سیکریفائز اسکیم کے تحت لوگ اب دو ہزار پاؤنڈ تک کی رقم ہی پینشن میں ڈال سکیں گے، پہلے اس کی کوئی حد نہیں تھی، پینشن میں دو ہزار سے زائد کی رقم ڈالنے پر ملازم اور ایمپلائر کو نیشنل انشورنس ادا کرنا ہوگی جس کا اطلاق اپریل 2029 سے ہوگا۔
ریچل ریوز نے کہا کہ پوری شرح کی نئی پینشن حاصل کرنے والوں کی پینشن میں اپریل سے 550 پاؤنڈ کا اضافہ ہوگا، انھوں نے انگلینڈ کیلئے نیا مینشن ٹیکس بھی متعارف، جس کے مطابق دو ملین سے زائد مالیت کے گھروں ڈھائی اور 5 ملین سے زائد والے گھروں پر 7,500 سالانہ ٹیکس لگے گا۔
انھوں نے کہا کہ الیکٹرک اور پلگ ان ہائبرڈ گاڑیوں پر نیا ٹیکس لگے گا جس کے بعد اپریل 2028 سے فی میل ادائیگی کرنا ہوگی، فیول ڈیوٹی آئندہ برس ستمبر تک منجمد رہے گی، جس کے بعد مرحلہ وار اضافہ ہوگا۔
چانسلر نے الیکٹرک کار گرانٹ اسکیم کیلئے اضافی 1.3 بلین پاؤنڈ کی فنڈنگ مختص کی، فنڈنگ سے الیکٹرک کاروں کے اہل ماڈلز کیلئے 3,750 پاؤنڈ کی سبسیڈی دی جائے گی، موبیلٹی اسکیم کے تحت لگژری کاریں حاصل نہیں کی جا سکیں گی۔
ریچل ریوز نے کہاکہ کیش انڈیویژول سیونگ اکاؤنٹس کے تحت ٹیکس فری رقم کی حد سالانہ 20 ہزار ہی رہے گی لیکن 8 ہزار سرمایہ کاری کیلئے مختص کئے جائیں گے البتہ 65 برس سے زائد عمر کے افراد 20 ہزار پاؤنڈ کے آئی ایس اے پر مکمل کیش الاوئنس کے حقدار رہیں گے۔
چائلڈ بینفیٹ دو بچوں تک محدود کرنے کی شرط آئندہ برس اپریل سے ختم کر دی جائے گی، 18 ماہ سے بیروزگار نوجوانوں کو روزگار کی تلاش میں مدد کیلئے معاوضہ کے ساتھ کام کی جگہ فراہم کی جائے گی، پراپرٹی اور سیونگ کے منافع پر ٹیکس کی شرح میں دو فیصد اضافہ ہوگا، گیملنگ پر ٹیکس کی تبدیلی سے 1.1 بلین پاؤنڈ جمع ہوں گے۔
انھوں نے کہا کہ طلبہ کے قرضوں کی واپسی کیلئے آمدنی کی کم از کم حد کو بھی تین برس کیلئے منجمد کردیا گیا ہے، چھوٹے بزنس کو انڈر 25 اپرنٹسز کو تربیت دینے پر گرانٹ فراہم کی جائے گی، 18 سے 21 برس کے نوجوانوں کو بیروزگار ہونے کی صورت میں بینیفٹ کے بجائے با معاوضہ کام کی پیشکش کی جائے گی، وراثتی ٹیکس میں تبدیلیاں کرکے شریک حیات کو 100 فیصد ریلیف الاؤنس دیا جائے گا۔
ایپ رائیڈ مثلاً اوبر اور بولٹ سے سفر پر بھی ٹیکس لگے گا، لندن اسٹاک ایکسچینج میں نئی شامل ہونے والی کمپنی کو تین برس کیلئے اسٹمپ ڈیوٹی سے استثنیٰ حاصل ہوگا، حکومت این ایچ ایس میں نئی ٹیکنالوجی متعارف کرنے کیلئے 300 پاؤنڈ کی سرمایہ کاری کرے گی۔
جی ڈی پی کا 2.6 فیصد دفاع پر خرچ ہوگا، ملک کی اقتصادی ترقی کی پیشگوئی کم کر دی گئی، جو 2026 کیلئے 1.4، 2027 کیلئے 1.6 اور 2028 کیلئے 1.5 فیصد کر دی گئی۔ کم از کم تنخواہ میں اضافے اور دودھ سے بننے والے مشروبات پر شوگر ٹیکس لگانے کی تفصیلات پہلے ہی سامنے آگئی تھیں۔
حکومت کو ملنے والے ریونیو کا سب سے بڑا حصہ 329 بلین پاؤنڈ انکم ٹیکس سے آتا ہے، بجٹ کے دوران ڈپٹی اسپیکر نصرت غنی کو ٹوری ارکان کی طرف سے بلند آواز میں شور مچانے پر متعدد بار مداخلت کرنا پڑی، اپوزیشن لیڈر لیمی بیڈینوک نے اپنے ردعمل میں کہا کہ امید ہے یہ ریچل ریوز کا آخری بجٹ ہوگا۔
اپوزیشن لیڈر کے مطابق انھوں نے اپنا ہر وعدہ توڑ دیا ہے، چانسلر نے گزشتہ برس 40 بلین پاؤنڈ کا ٹیکس لگایا ہے، انھوں نے کہا کہ حکومت نے ملک شیک سمیت ہر چیز پر ٹیکس لگا دیا ہے، بجٹ پیش کئے جانے کے موقع پر پارلیمنٹ کے باہر کسانوں نے اپنے مطالبات کے حق میں مظاہرہ بھی کیا۔
