فرمان الہی
نماز کے اوقات
سردیوں کے موسم میں کھانسی کا لمبے عرصے تک برقرار رہنا عام اور پریشان کُن مسئلہ بن چکا ہے جس سے متعلق ماہرین کی رائے سامنے آئی ہے۔
طبی ماہرین کے مطابق سردیوں میں کھانسی کی طویل مدت کی بڑی وجوہات خشک اور سرد ہوا، بڑھتی فضائی آلودگی اور غیر صحت مند روزمرہ عادات ہیں جس کے باعث کھانسی ہفتوں اور مہینوں تک نہیں جاتی۔
ماہرین کا کہنا ہے کہ درجۂ حرارت 10 ڈگری سینٹی گریڈ سے نیچے گرنے پر ٹھنڈی اور خشک ہوا سانس کی نالیوں کو سکیڑ دیتی ہے جس سے سوزش بڑھتی ہے اور مدافعتی نظام کمزور پڑ جاتا ہے۔
ماہرین کے مطابق فلو یا نزلے کے بعد ہونے والی کھانسی 3 سے 8 ہفتے تک جاری رہ سکتی ہے۔
تحقیق کے مطابق ناک کے درجۂ حرارت میں صرف 5 ڈگری کمی سے وائرس سے لڑنے والے مدافعتی خلیات تقریباً 50 فیصد تک کم ہو سکتے ہیں جبکہ فضائی آلودگی اس صورتحال کو مزید سنگین بنا دیتی ہے۔
سردیوں میں ’ٹمپریچر انورژن‘ کے سبب آلودگی کے ذرات فضا میں پھنس جاتے ہیں جس سے ایئر کوالٹی انڈیکس خطرناک حد تک بڑھ جاتا ہے۔ بند جگہوں میں زیادہ وقت گزارنے سے فلو اور RSV جیسے وائرس تیزی سے پھیلتے ہیں۔
ڈاکٹروں کا کہنا ہے کہ کچھ روزمرہ کی عادات بھی کھانسی کے ٹھیک ہونے میں رکاوٹ بنتی ہیں۔ سگریٹ نوشی سانس کی نالیوں کو خشک کر دیتی ہے اور بلغم کے اخراج کو مشکل بناتی ہے جبکہ دھوئیں میں سانس لینا بھی نقصان دہ ہے۔
طبی ماہرین کے مطابق سردیوں میں پانی کم پینا بلغم کو گاڑھا کر دیتا ہے اور سات گھنٹے سے کم نیند لینے سے قوتِ مدافعت مزید کمزور ہو جاتی ہے۔
ماہرین نے کھانسی سے جَلد نجات کے لیے چند سادہ عادات اپنانے کا مشورہ دیا ہے۔
طبی ماہرین کا کہنا ہے کہ روزانہ 3 سے 4 لیٹر نیم گرم پانی یا مشروبات پینا، تمباکو نوشی ترک کرنا، 7 سے 9 گھنٹے کی مکمل نیند لینا اور ادرک، ہلدی، لہسن اور تازہ پھلوں پر مشتمل غذا کا استعمال کرنا مفید ثابت ہو سکتا ہے۔
موسم سرما کے دوران گھروں میں نمی 40 سے 60 فیصد رکھنے کے لیے ہیومیڈیفائر کا استعمال بھی مددگار ثابت ہوتا ہے۔
احتیاطی تدابیر کے طور پر ماہرین فلو ویکسین لگوانے، زیادہ آلودگی والے دنوں میں این 95 ماسک پہننے اور گھروں میں مناسب ہوا کی آمدورفت برقرار رکھنے پر زور دیتے ہیں۔
طبی ماہرین کی جانب سے اگر کھانسی تین ہفتوں سے زیادہ رہے یا اس کے ساتھ بخار اور سانس میں دقت ہو تو فوری طور پر ڈاکٹر سے رجوع کرنے کا مشورہ دیا گیا ہے۔
نوٹ: یہ ایک معلوماتی مضمون ہے، اپنی کسی بھی بیماری اور اس کی تشخیص کےلیے ڈاکٹر سے رجوع کریں۔
