فرمان الہی
نماز کے اوقات
سپر فوڈ السی (فلیکس سیڈ) کے بیج صحت کے لیے بے حد مفید سمجھے جاتے ہیں تاہم ماہرین کا کہنا ہے کہ اِنہیں صحیح طریقے سے استعمال نہ کیا جائے تو جسم کو مکمل غذائیت حاصل نہیں ہو پاتی۔
تحقیق کے مطابق ثابت السی کے بیجوں کا چھلکا سخت ہوتا ہے جو اکثر ہضم نہیں ہو پاتا جس کے نتیجے میں یہ بغیر ٹوٹے اور ہضم ہوئے نظامِ ہاضمہ سے گزر سکتے ہیں اور ان کے غذائی اجزا جسم کو نہیں ملتے، اس لیے زیادہ فوائد حاصل کرنے کے لیے السی کو ہمیشہ پیس کر استعمال کرنا بہتر ہے۔
غذائی ماہرین کے مطابق السی اومیگا تھری فیٹی ایسڈ (ALA)، فائبر اور طاقتور اینٹی آکسیڈنٹس سے بھرپور ہوتی ہے۔
یہ دل کی صحت بہتر بنانے، سوزش کم کرنے، دماغی کارکردگی بڑھانے، کولیسٹرول متوازن رکھنے اور ہاضمہ درست رکھنے میں مددگار ثابت ہوتی ہے۔
فائبر کی زیادہ مقدار پیٹ بھرنے کا احساس بڑھاتی ہے جس سے وزن کنٹرول میں رکھنے میں مدد ملتی ہے۔
ماہرین کا کہنا ہے کہ السی کو کافی گرائنڈر یا فوڈ پروسیسر میں پیس کر استعمال کیا جائے، پسی ہوئی السی کو ہوا بند ڈبے میں فریج یا فریزر میں رکھنا چاہیے کیونکہ یہ جَلد خراب ہو سکتی ہے۔
السی کو پانی میں رات بھر بھگو کر بھی استعمال کیا جا سکتا ہے، اس سے جیلی جیسا مادہ بن جاتا ہے جو معدے اور آنتوں کی صحت کے لیے مفید ہے۔
غذائی ماہرین کے مطابق روزانہ ایک سے دو کھانے کے چمچ پسی ہوئی السی کا استعمال محفوظ سمجھا جاتا ہے۔
صبح نہار منہ نیم گرم پانی کے ساتھ پسی ہوئی السی کا استعمال کرنے سے ہاضمہ بہتر ہوتا ہے جبکہ کھانے سے پہلے ایک چمچ لینے سے جَلد پیٹ بھرنے کا احساس ہوتا ہے۔
السی کو اسموتھی میں شامل کیا جا سکتا ہے۔
مفنز، پین کیک یا بریڈ میں بھی استعمال کریں۔
السی کا پاؤڈر دہی، دلیہ یا سلاد پر چھڑک کر کھائیں۔
السی کے تیل کو سلاد ڈریسنگ میں استعمال کریں تاہم اسے زیادہ آنچ پر پکانے سے گریز کریں۔
اہم ہدایات
السی استعمال کرتے وقت پانی زیادہ پئیں کیونکہ اس میں فائبر کی مقدار زیادہ ہوتی ہے، ابتدا میں کم مقدار سے آغاز کریں، حاملہ خواتین، دودھ پلانے والی مائیں یا ہارمون سے متعلق مسائل رکھنے والے افراد زیادہ مقدار لینے سے پہلے ڈاکٹر سے مشورہ کریں۔
ماہرین کے مطابق السی کو روزمرہ خوراک کا حصہ بنا کر مجموعی صحت کو بہتر بنایا جا سکتا ہے۔
نوٹ: یہ مضمون قارئین کی معلومات کیلئے شائع کیا گیا ہے، صحت سے متعلق امور میں اپنے معالج کے مشورے پر عمل کریں۔
