فرمان الہی
نماز کے اوقات
برطانوی حکومت نے سیاسی پناہ کے طالب افراد کو ہوٹلوں سے نکال کر سابقہ فوجی بیرکوں میں رکھنے پر کام شروع کر دیا۔
برطانوی ہوم آفس نے تصدیق کی ہے کہ اس سلسلے میں پہلے مرحلے میں 27 سیاسی پناہ گزینوں کو ایسٹ سسیکس میں سابق فوجی سائٹ پر منتقل کر دیا گیا ہے۔
ایسٹ سسیکس کے کرو برا ٹریننگ کیمپ میں مجموعی طور پر 500 سے زائد پناہ گزینوں کو رکھا جائے گا۔
ہوم سیکریٹری شبانہ محمود نے کہا ہے کہ کرو برا صرف شروعات ہے، یہ اقدام مہنگے ہوٹلوں میں پناہ گزینوں کی رہائش ختم کرنے کا حصہ ہے۔
شبانہ محمود کا کہنا ہے کہ سیاسی پناہ گزینوں کا ہر ہوٹل بند کرنے تک ایسے مقامات متعارف کراتے رہیں گے۔
واضح رہے کہ پناہ گزینوں کی سابقہ فوجی بیرکوں میں منتقلی کے حکومتی فیصلے کے خلاف مظاہرے بھی ہوئے تھے، تاہم حکومت کا مؤقف ہے کہ کرو برا جیسے مقامات پر پناہ گزینوں کی منتقلی سے برطانیہ کو پرکشش مقام سمجھ کر آنے والوں کی حوصلہ شکنی ہو گی۔
ہوم آفس کے مطابق گزشتہ حکومت کے دور میں سیاسی پناہ گزینوں کے لیے کھولے گئے 400 سے زائد ہوٹلوں پر یومیہ 9 ملین پاؤنڈ خرچ ہورہے تھے، تاہم اب صرف 2 سو سے کم ہوٹلوں میں سیاسی پناہ گزین مقیم ہیں اور مجموعی اخرجات بھی 15 فیصد کم ہیں۔
ویلڈن ڈسٹرکٹ کونسل کے لیڈر جیمز پارٹریج کے مطابق کروبرا میں ایسی پناہ گزینوں کو رکھنے کا فیصلہ غلط ہے اور مقامی اتھارٹی اس بات کا جائزہ لے رہی ہے کہ کیا اس اقدام کو قانونی طور پر چیلنج کیا جا سکتا ہے۔
