فرمان الہی
نماز کے اوقات
جناح ایئرپورٹ پر 3 اہم اداروں کی چیکنگ عبور کرنے والے عمرہ مسافروں سے ممنوع اشیاء برآمد کر لی گئیں، 5 مسافروں اور ان کے تین سہولت کاروں کو حراست میں لے لیا گیا ہے۔
حکام کے مطابق مسافر 3 اہم سیکیورٹی چیک پوائنٹس اے این ایف، کسٹم اور اے ایس ایف عبور کرنے کے بعد امیگریشن کلیئرنس کے لیے پہنچے۔ مسافروں میں شاہ فیصل، محمد ہاشم، اسداللّٰہ، وقاص اور محسن شیخ شامل ہیں جو پاکستانی پاسپورٹس پر عمرہ ویزا کے حامل ہو کر سعودی عرب روانہ ہو رہے تھے۔
امیگریشن کلیئرنس کے دوران جناح انٹرنیشنل ایئرپورٹ پر کاؤنٹر افسران کی جانب سے مشکوک حرکات کے باعث مذکورہ مسافروں کو مزید جانچ پڑتال کے لیے انچارج اور جی آر او کے پاس ریفر کیا گیا۔ جانچ پڑتال کے دوران یہ انکشاف ہوا کہ کسی بھی مسافر کے پاس ہوٹل بکنگ موجود نہیں تھی اور نہ ہی ان کے پاس عمرہ کی ادائیگی کے لیے مناسب مالی وسائل تھے۔
تفصیلی پوچھ گچھ کے دوران معلوم ہوا کہ مذکورہ مسافر امیگریشن کاؤنٹر تک پہنچنے سے قبل ایئرپورٹ سیکیورٹی فورس، اینٹی نارکوٹکس فورس اور کسٹمز کے تین سیکیورٹی چیک پوائنٹس عبور کر چکے تھے۔
امیگریشن سیکشن میں تفتیش کے دوران مسافروں کا سامان معائنہ کے لیے طلب کیا گیا۔ معائنے پر ان کے قبضے سے سگریٹ، نسوار، تمباکو، ادویاتی کریمیں، چھالیہ (Betel Nuts) اور دیگر ممنوع اشیاء کی بھاری مقدار برآمد ہوئی۔
حکام کے مطابق مصدقہ خفیہ معلومات کی بنیاد پر 3 سہولت کاروں کو بھی جناح انٹرنیشنل ایئرپورٹ کے احاطے سے حراست میں لیا گیا جنہوں نے غیر قانونی کاروبار میں اپنے ملوث ہونے کا اعتراف کیا ہے۔ تمام 8 گرفتار افراد کو مزید قانونی کارروائی اور تفصیلی تفتیش کے لیے کسٹمز حکام کے حوالے کر دیا گیا ہے۔
حکام کے مطابق اس بات کی تحقیق کی جا رہی ہے کہ مسافر تین اہم اداروں کی چیک پوائنٹس سے بچ کر کیسے نکلے؟
