فرمان الہی
نماز کے اوقات
پاکستان نے ٹی ٹوئنٹی ورلڈکپ 2026 کے لیے 15 رکنی اسکواڈ کا اعلان کر دیا، سلمان علی آغا پاکستان ٹیم کے کپتان ہوں گے۔
لاہور میں کپتان سلمان علی آغا، ہیڈ کوچ مائیک ہیسن اور ڈائریکٹر ہائی پرفارمنس سینٹر عاقب جاوید نے پریس کانفرنس کرتے ہوئے ورلڈ کپ کے لیے ٹیم کا اعلان کیا۔
ٹی ٹوئنٹی ورلڈ کپ اسکواڈ میں فہیم اشرف، خواجہ محمد نافع، محمد سلمان مرزا، صاحبزادہ فرحان اور عثمان طارق شامل ہیں۔
ابرار احمد، بابر اعظم، فخر زمان، محمد نواز، شاہین شاہ آفریدی، عثمان خان، صائم ایوب، شاداب خان اور نسیم شاہ بھی ورلڈ کپ اسکواڈ کا حصہ ہیں۔
اس موقع پر گفتگو کرتے ہوئے ڈائریکٹر ہائی پرفارمنس سینٹر عاقب جاوید نے کہا کہ حارث رؤف ایک عرصے سے ہمارے ساتھ ہیں، بہترین کمبی نیشن دیکھتے ہوئے ٹیم سلیکٹ کی ہے، جو کرکٹ سری لنکا میں ہوسکتی ہے اس کے حساب سے کھلاڑیوں کو منتخب کیا گیا ہے۔
انہوں نے کہا کہ ٹیسٹ، ون ڈے اور ٹی ٹوئنٹی کے لیے ایک ہی انتخاب نہیں ہوسکتا۔
عاقب جاوید کا کہنا تھا کہ بابر اعظم کے حوالے سے کوچ اور کپتان کو بھی لگتا ہے کہ وہ اہم کردار ادا کرسکتے ہیں۔
کپتان سلمان علی آغا نے کہا کہ ایک ہی جگہ پر میچز کھیلنے سے ایڈوانٹیج ہے لیکن اس کے باوجود اچھی کرکٹ کھیلنی پڑے گی۔ ورلڈ کپ کے لیے تیار اور پرجوش ہیں۔
سلمان علی آغا نے کہا کہ بابراعظم کا بگ بیش اچھا نہیں گیا، لیکن انہوں نے پاکستان کے لیے اچھا پرفارم کیا ہے۔
ہیڈ کوچ مائیک ہیسن نے کہا کہ عثمان خان کی کارکردگی ٹیم میں واپسی کے بعد بہترین رہی ہے، وکٹ کیپر کا کردار بیٹنگ میں چھٹے نمبر پر ہے۔
انہوں نے کہا کہ ورلڈ کپ میں خواجہ نافع کو متبادل وکٹ کیپر کے طور پر شامل کیا ہے۔
مائیک ہیسن نے مزید کہا کہ صاحبزادہ فرحان بھی کیپنگ کے لیے موجود ہیں، لیکن ان پر بوجھ نہیں ڈالیں گے، صاحبزادہ فرحان ٹی ٹوئنٹی ٹیم کا اہم رکن ہے۔
ایک سوال پر عاقب جاوید نے کہا کہ ہم سلیکٹر ہیں اور ہمارا کام ٹیم سلیکٹ کرنا ہے، یہ فیصلہ حکومت کو کرنا ہے کہ ہم نے ورلڈکپ کھیلنا ہے یا نہیں۔
ٹی ٹوئنٹی ورلڈکپ کے میچز 7 فروری سے 8 مارچ تک ہوں گے، پاکستان 7 فروری کو نیدرلینڈز کے خلاف ورلڈ کپ مہم کا آغاز کرے گا۔
