فرمان الہی
نماز کے اوقات
پاکستانی میڈیا انڈسٹری سے وابستہ معروف میزبان و اداکارہ عائشہ جہانزیب نے گھریلو تشدد کے باعث پیش آنے والے صحت کے مسائل سے پردہ اُٹھا دیا۔
یاد رہے کہ 2024ء میں عائشہ جہانزیب اُس وقت خبروں کی زینت بنیں جب انہوں نے گھریلو تشدد کے باعث اپنے دوسرے شوہر سے طلاق لے لی۔
حال ہی میں میزبان نے ایک پوڈکاسٹ میں شرکت کی، مذکورہ انٹرویو کا ایک ویڈیو کلپ سوشل میڈیا پر وائرل ہو رہا ہے، جس میں عائشہ جہانزیب نے تشدد کے بعد درپیش صحت کے مسائل کا تذکرہ کیا ہے۔
انہوں نے گفتگو کرتے ہوئے کہا کہ الحمدللّٰہ! میں اب بالکل ٹھیک ہوں، میں اس پلیٹ فارم سے یہ کہنا چاہتی ہوں کہ اگر آپ کی کمر تک کٹ جائے تب بھی آپ نارمل زندگی گزار سکتے ہیں، بس درد برداشت کرنا پڑتا ہے۔
انہوں نے کہا کہ گھریلو تشدد کے باعث مجھے شدید طبی مسائل کا سامنا رہا ہے، مختلف وجوہات کی بنا پر میری 4 سے 5 ڈسکس اپنی جگہ سے ہٹ گئی تھیں، دوبارہ اپنے پیروں پر کھڑا ہونے کے لیے مجھے بے حد محنت اور جدوجہد کرنا پڑی۔
عائشہ جہانزیب نے کہا کہ میرے بچے مجھے واش روم تک اٹھا کر لے جاتے تھے، اور میرے گھر کے ملازم جانتے ہیں کہ میں نے ان مہینوں میں کیا کچھ برداشت کیا۔
واضح رہے کہ عائشہ جہانزیب نے اپنے کیریئر کا آغاز ’جیو نیوز‘ کے پروگرام آفتاب اقبال کے مقبول شو خبرناک سے کیا، بعد ازاں انہوں نے مختلف پروگرامز کی میزبانی بھی کی۔
عائشہ جہانزیب 5 باصلاحیت بچوں کی والدہ ہیں، ان کی شادی کم عمری میں ہوئی تھی، ان کے پہلے شوہر کا انتقال کینسر سے ہو گیا تھا۔
