فرمان الہی
نماز کے اوقات
اسرائیلی وزیرِاعظم نیتن یاہو نے کہا ہے کہ وہ بھارت کے ’ذاتی طور پر مقروض‘ ہیں کیونکہ ان کی اہلیہ سارہ سے پہلی ملاقات تل ابیب کے ایک بھارتی ریسٹورنٹ میں ہوئی تھی۔
بھارتی وزیرِ اعظم نریندر مودی کے ساتھ مشترکہ پریس بیان میں گفتگو کرتے ہوئے نیتن یاہو نے کہا کہ میں بھارت کا ذاتی طور پر بڑا مقروض ہوں، جب میں سارہ سے پہلی بار ملا تو میرا خیال ہے کہ ہماری پہلی یا دوسری ملاقات تل ابیب کے ایک بھارتی ریسٹورنٹ میں ہوئی تھی۔
انہوں نے مزید کہا کہ سارہ اس سے قبل بھارتی کھانوں سے متعارف نہیں تھیں، اس لیے یہ ایک یادگار پہلی ملاقات تھی، کھانا ناقابلِ یقین حد تک لذیذ تھا اور ملاقات بھی شاندار رہی تھی۔
نیتن یاہو کے مطابق یہ ریسٹورنٹ معروف بھارتی نژاد شیف رینا چلاتی ہیں، جو اسرائیل میں مستند بھارتی کھانوں کو متعارف کرانے کے حوالے سے شہرت رکھتی ہیں اور ’کری کوئین‘ کے نام سے بھی جانی جاتی ہیں۔
دریں اثناء بھارتی وزیرِ اعظم نریندر مودی نے اپنے 2 روزہ سرکاری دورۂ اسرائیل کے دوران تل ابیب میں نیتن یاہو سے ملاقات کی۔
اسرائیلی وزیرِ اعظم اور ان کی اہلیہ نے ہوائی اڈے پر ذاتی طور پر استقبال کیا، اس موقع پر گارڈ آف آنر بھی پیش کیا گیا۔
دونوں ممالک نے دفاعی تعاون کو مزید وسعت دینے، مشترکہ پیداوار اور ٹیکنالوجی کی منتقلی کے فریم ورک کے تحت عسکری ساز و سامان کی تیاری پر مل کر کام کرنے کے عزم کا اظہار کیا۔
