فرمان الہی
نماز کے اوقات
کور کمانڈرز کانفرنس نے سعودی عرب کے پیٹروکیمیکل، صنعتی کمپلیکس پر حالیہ حملوں کی شدید مذمت کرتے ہوئے تشویش کا اظہار کیا ہے۔
پاک افواج کے شعبہ تعلقات عامہ آئی ایس پی آر کے مطابق فیلڈ مارشل سید عاصم منیر کی زیر صدارت 274ویں کور کمانڈرز کانفرنس منعقد ہوئی۔
آئی ایس پی آر کے مطابق فورم کا کہنا ہے کہ ایران کے سعودی عرب پر حملے پُرامن ذرائع سے تنازعے کے حل کی مخلصانہ کوششوں کو نقصان پہنچا رہے ہیں۔ سعودی عرب پر حملے ایک غیر ضروری کشیدگی ہیں۔ اس نوعیت کے حملے اور بلاجواز جارحیت جاری پُرامن کوششوں اور سازگار ماحول کو سنگین طریقے سے متاثر کرتی ہیں۔
کور کمانڈرز کانفرنس میں کہا گیا کہ سعودی عرب نے سنگین اشتعال انگیزیوں کے باوجود اب تک تحمل اور محتاط رویے کا مظاہرہ کیا ہے۔ سعودی عرب کے اس رویے سے ثالثی اور سفارتی حل کی راہ ہموار ہوئی ہے۔
مشرق وسطیٰ میں جنگ کے خاتمے کیلئے حکومتی کوششوں کی ستائش
فورم نے مشرق وسطیٰ میں جنگ کے خاتمے کیلئے حکومت کی بھرپور کوششوں کو سراہا اور کہا کہ پاکستان متحمل مذاکرات، کشیدگی میں کمی اور اصولی سفارتکاری کیلئے پرعزم ہے۔
کانفرنس کے شرکا کا کہنا تھا کہ ایک ذمہ دار اسٹیک ہولڈر کے طور پر پاکستان علاقائی سلامتی کے استحکام کے طور پر فعال ریجنل سیکیورٹی اسٹیبلائزر کا کردار ادا کر رہا ہے۔
شہدا کی بے مثال قربانیوں کو خراج عقیدت
کور کمانڈر کانفرنس میں فورم نے مسلح افواج، قانون نافذ کرنے والے اداروں اور مادر وطن کے دفاع میں جانوں کا نذرانہ پیش کرنے والوں کیلئے فاتحہ خوانی کی گئی۔
فورم نے شہدا کی بے مثال قربانیوں کو خراج عقیدت پیش کیا اور کہا کہ شہدا کی لازوال قربانیاں پاکستان کی سلامتی کی اساس ہے۔
آپریشن غضب لِلحق کی رفتار برقرار رکھی جائے گی
فورم نے کہا کہ بھارت اور دیگر بیرونی سرپرستوں کی ایما پر کام کرنے والے تمام دہشتگردوں کا خاتمہ کیا جائے گا۔ دہشتگردوں کے سہولت کاروں اور معاونین کو بلاامتیاز اور مسلسل تعاقب کے ذریعے ختم کیا جائے گا۔ آپریشن غضب لِلحق کی رفتار برقرار رکھی جائے گی یہاں تک کہ دہشتگردوں کی محفوظ پناہ گاہوں کا مکمل خاتمہ ہوجائے۔
شرکا کا کہنا تھا کہ پاکستان کے خلاف افغان سرزمین کے استعمال کو فیصلہ کن طور پر مکمل ختم کیا جائے گا۔
بھارت کے بےبنیاد الزامات مسترد
فورم نے بھارت کی جانب سے منسوب مسلسل گمراہ کن معلومات اور بے بنیاد الزامات کو مسترد کردیا اور کہا کہ بھارت کے اس طرح کے ہتھکنڈے عالمی سطح پر بےنقاب ہو چکے ہیں۔
کور کمانڈرز کانفرنس نے مقبوضہ کشمیر میں بھارت کی انسانی حقوق کی مسلسل خلاف ورزیوں پر تشویش کا اظہار کیا۔ فورم نے مقبوضہ کشمیر میں ماورائے عدالت اموات چھپانے اور جعلی مقابلوں پر بھی تشویش کا اظہار کیا۔
پاکستان استحکام کی جانب گامزن ہے: فیلڈ مارشل
فیلڈ مارشل کا کہنا تھا کہ حکومت، مسلح افواج، عوام کے تعاون اور ہم آہنگی سے پاکستان استحکام کی جانب گامزن ہے۔ پاکستان معاشی استحکام کو مضبوط بنانے اور علاقائی و عالمی سطح پر اپنی حیثیت بہتر بنانے کی جانب گامزن ہے۔
چیف آف ڈیفنس فورسز نے مسلح افواج کی غیر متزلزل پیشہ ورانہ مہارت کو سراہا۔ فیلڈ مارشل نے آپریشنل کارکردگی، دفاع وطن کیلئے پائیدار انٹیلیجنس کی بنیاد پر انسداد دہشتگردی کی کارروائیوں کیلئے ثابت قدمی کو سراہا۔
آپریشنل تیاری، نظم و ضبط کا اعلیٰ معیار برقرار رکھنے کی ہدایت
کانفرنس کے اختتام پر آرمی چیف نے کمانڈرز کو آپریشنل تیاری، نظم و ضبط کا اعلیٰ معیار برقرار رکھنے کی ہدایت کی۔ آرمی چیف نے نئی جدتیں اور میدان جنگ میں پیشہ ورانہ مہارت کے اعلیٰ معیار برقرار رکھنے کی بھی ہدایت کی۔
چیف آف ڈیفنس فورسز نے مسلح افواج کی ہر قسم کے خطرات کا مقابلہ کرنے کی صلاحیت پر مکمل اعتماد کا اظہار کیا۔ انہوں نے پاکستان کی خودمختاری، علاقائی سالمیت یقینی بنانے کی صلاحیت پر بھی مکمل اعتماد کا اظہار کیا۔
