فرمان الہی
نماز کے اوقات
پاکستان کے قونصل جنرل مانچسٹر کے زیر اہتمام مانچیسٹر کے مقامی ہوٹل میں “معرکۂ حق” کی پہلی سالگرہ نہایت وقار اور احترام کے ساتھ منائی گئی، جس میں پاکستان کی مسلح افواج کی بہادری، پیشہ ورانہ صلاحیتوں اور فیلڈ مارشل سید عاصم منیر کی قیادت کو خراجِ تحسین پیش کیا گیا اور سول قیادت اور عوام کو فتح پر خراج تحسین پیش کیا گیا۔
تقریب میں برطانیہ میں مقیم پاکستانی کمیونٹی کے مختلف شعبہ ہائے زندگی سے تعلق رکھنے والے افراد کی بڑی تعداد نے شرکت کی، جنہوں نے پاکستان کے ساتھ اپنی غیر متزلزل وابستگی اور یکجہتی کا بھرپور اظہار کیا۔ یہ تقریب اوورسیز پاکستانیوں کے اتحاد، حب الوطنی اور قومی جذبے کی عکاس تھی۔
تقریب کا آغاز قاری افتخار سیالوی کی تلاوتِ کلامِ پاک سے ہوا۔ بعد ازاں قومی ترانہ بجائے جانے پر شرکاء احتراماً کھڑے ہوگئے۔ مقامی بزنس مین چوہدری عبدالکریم نے معزز مہمانوں اور شرکاء کا خیرمقدم کرتے ہوئے تقریب کے باوقار ماحول کو مزید جِلا بخشی۔
ممتاز مقررین، جن میں رکنِ پارلیمنٹ افضل خان، صوبائی وزیر/وائس چیئرمین اوورسیز پاکستانیز کمیشن (او پی سی) بیرسٹر امجد ملک، ڈاکٹر لیاقت ملک، فادر فلک شیر، ڈاکٹر حامد المشرقی اور مختلف میڈیا اداروں کے نمائندگان شامل تھے، نے پاکستان کی مسلح افواج کی جرات، قربانیوں اور قومی خدمات کو زبردست خراجِ تحسین پیش کیا۔
رکنِ پارلیمنٹ افضل خان نے قومی خودمختاری کے تحفظ کے لیے ایک مضبوط اور پیشہ ور مسلح افواج کی اہمیت پر زور دیا۔ انہوں نے معرکۂ حق کے دوران اوورسیز پاکستانیوں کے کلیدی کردار کو بھی سراہا اور اس نازک مرحلے میں ان کی مسلسل حمایت اور عملی وابستگی کو قابلِ تحسین قرار دیا۔
وزیر/وائس چیئرمین او پی سی بیرسٹر امجد ملک نے پاکستان کی مسلح افواج کی پیشہ ورانہ مہارت، ان کی قیادت، اور معرکۂ حق کے دوران قوم کے اتحاد اور استقامت پر روشنی ڈالی۔ انہوں نے اس اہم دور میں وزیراعظم محمد شہباز شریف اور نائب وزیراعظم سینیٹر اسحاق ڈار کی قیادت کو بھی خراجِ تحسین پیش کیا۔
دیگر مقررین نے اوورسیز پاکستانیوں کے جذبات کی بھرپور ترجمانی کرتے ہوئے پاکستان اور اس کی قیادت کے ساتھ اپنی غیر متزلزل حمایت کا اعادہ کیا۔
اپنے خطاب میں قونصل جنرل جناب امتیاز فیروز گوندل نے برطانوی پاکستانی کمیونٹی کی مستقل حمایت پر شکریہ ادا کیا۔ انہوں نے کہا کہ معرکۂ حق کے دوران پاکستان کی مسلح افواج نے غیر معمولی جرات، عملی مہارت اور تکنیکی برتری کا مظاہرہ کیا۔
انہوں نے اس کامیابی میں فیلڈ مارشل سید عاصم منیر کی قائدانہ صلاحیتوں کو کلیدی قرار دیا، جبکہ وزیراعظم محمد شہباز شریف اور نائب وزیراعظم سینیٹر اسحاق ڈار کی مثالی قیادت کو بھی سراہا۔
قونصل جنرل نے اوورسیز پاکستانیوں پر زور دیا کہ وہ پاکستان، اس کی مسلح افواج اور قومی قیادت کی حمایت میں متحد رہیں۔ انہوں نے مقامی سماجی، شہری اور سیاسی سرگرمیوں میں کمیونٹی کے باہمی اتحاد اور اجتماعی کردار کی اہمیت پر بھی زور دیا۔
تقریب کے اختتام پر چوہدری طاہر صدیق نے اظہارِ تشکر پیش کرتے ہوئے تمام شرکاء، مقررین اور منتظمین کی کاوشوں کو سراہا، جن کی بدولت یہ تقریب کامیابی سے ہمکنار ہوئی۔
تقریب کا اختتام پاکستان کی خودمختاری، استحکام اور ترقی کے لیے اتحاد، استقامت اور مسلسل حمایت کے عزم کیساتھ ہوا۔
