’سنجو‘ کے ٹیزر نے یوٹیوب پر دھوم مچا دی

بالی ووڈ کے معروف اداکار سنجے دت کی زندگی پر نئی فلم بننے جارہی ہے جس میں اداکار رنبیر کپور سنجو بابا کا کردار نبھاتے نظر آئیں گے۔

بھارتی میڈیا رپورٹس کے مطابق اس فلم کا دلچسپ ٹیزر جاری کردیا گیا ہے جسے شائقین کی جانب سے بھرپور پذیرائی حاصل ہو رہی ہے اور اسے یوٹیوب پراب تک ایک کروڑ 58 لاکھ 8 ہزار 8 سو 86افراد نے دیکھ لیا۔

اس فلم میں رنبیر سنجے دت کا روپ دھارے اپنی اداکاری کے جوہر دکھاتے نظر آئیں گے جبکہ منیشا کوئرالہ بھی اس فلم میں نرگس دت یعنی فلم میں رنبیر کپور کی ماں کا کردار ادا کریں گی۔

ایک منٹ 25 سیکنڈ دورانیے پر مشتمل فلم میں سنجے دت کی نوجوانی سے لے کر 50 سال تک کی زندگی کو پیش کیا گیا ہے۔ٹیزر میں رنیبر کپور کو بہترین اداکاری کرتے دیکھا جاسکتا ہے اور وہ بالکل سنجے دت سے مشابہہ نظر آرہے ہیں۔

ٹیزر میں سنجے دت کے مختلف روپ دکھائے گئے اور تقریبا ہر روپ میں رنبیر کپور چاکلیٹی ہیرو کے بجائے ’سنجو‘ بابا کے طور پر دکھائی دیئے۔

اس فلم میں جہاں رنبیر کپور نے سنجے دت کا کردار ادا کیا ہے، وہیں دیا مرزا نے سنجے دت کی اہلیہ جبکہ منیشا کوئرالہ نے ان کی والدہ کا کردار ادا کیا ہے۔

راج کمار ہیرانی کی ہدایت کاری میں بننے والی اس فلم میں رنبیر کپور اور منیشا کے علاوہ سونم کپور،دیا مرزا اور انوشکا شرما بھی مرکزی کردار میں جلوہ گر ہوں گی۔

فلم 29جون کو سنیما گھروں میں ریلیز کی جائے گی۔