سجدہ میں پاؤں کی انگلیاں زمین پر لگنے کی شرط سے کیا مراد ہے ؟

15 جون ، 2018

آپ کے مسائل اور اُن کا حل

سوال:۔ نماز میں سجدے کی حالت میں پاؤں کی انگلیوں کے سرے کا زمین پر لگنے کی شرط سے کیا مراد ہے، رکوع کے بعد سجدے میں جاتے ہوئے دونوں پاؤں دائیں طرف نکالنے کی وجہ سے میری کسی انگلی کا سرا زمین پر نہیں لگتا،اس سلسلے میں ازروئے شریعت رہنمائی فرمادیں۔(ح۔ رفیق)

جواب:۔ اصل یہ ہے کہ سجدے کی حالت میں دونوں پاؤں زمین پر رکھنا واجب ہے، عذر کے بغیر ایک پاؤں کو اٹھانا بھی مکروہ تحریمی ہے، اگر پورے سجدے میں دونوں پیروں کو بالکل زمین سے اٹھائے رکھا تو سجدہ ادا نہیں ہوگا، کم از کم ایک انگلی کسی وقت زمین پر رکھ لی جائے تو فرض ادا ہوجائے گا۔ دونوں پاؤں کی انگلیوں کا رخ قبلے کی طرف سنت ہے۔ انگلی زمین سے لگانے کا مطلب یہ ہے کہ انگلی کے سرے کا گوشت زمین سے لگے یعنی انگلی زمین پر مڑجائے، البتہ چوں کہ عورتوں کے لیے نماز میں نبی کریم ﷺ کی ہدایت یہ ہے کہ وہ سمٹ کر سجدہ کریں ، کیوں کہ یہ ان کے لیے زیادہ سترپوشی کا باعث ہے ،اس لیے عورت سجدے میں پاؤں کھڑا کرکے انگلیاں قبلہ رخ نہ کرے، بلکہ دونوں پاؤں دائیں طرف نکال کر سمیٹ کر سجدہ کرے اور وسعت کے مطابق پاؤں کی انگلیاں قبلہ رخ کرنے کی کوشش کرے۔ (السنن الکبریٰ للبيہقی ،2 / 315ہندیہ ،1 / 70،بحر (1 / 336)

تازہ ترین