• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

المصطفیٰ ٹرسٹ کے زیر اہتمام لاہور میں طلبا و طالبات کیلئے فری آئی کیمپ

آج کا اخبار
یورپ سے
19 جولائی ، 2018
لندن(پ ر)المصطفیٰ ویلفیئر ٹرسٹ کے تعاون سے ایوان کارکنان تحریک پاکستان،شاہراہ قائداعظمؒ لاہورمیں جاری نظریاتی سمر سکول کے18ویں سالانہ تعلیمی سیشن کے دوران طلباوطالبات کی آنکھوں کے معائنہ کیلئے فری آئی کیمپ لگایا گیا۔ المصطفیٰ کے تعاون سے لگائے گئے اس کیمپ کے دوران کمپیوٹر کے ذریعے بچوں کی آنکھوں کا معائنہ کیا گیا اور کمزور بینائی والے بچوں کو مفت عینکیں فراہم کی گئیں۔ المصطفیٰ ویلفیئر ٹرسٹ کے چیئرمین عبدالرزاق ساجد نے کہا ہے کہ آنکھیں اللہ تعالیٰ کی بہت بڑی نعمت ہیں ۔آج کل بچوں میں بینائی کی کمزوری، ککرے، سفید موتیا اور بھینگا پن کے امراض عام ہیں۔ بچوں کی آنکھوں کے امراض کا علاج دس سال کی عمر تک لازمی ہونا چاہئے۔ بروقت علاج نہ ہونے سے بچے ساری عمر کیلئے اندھے پن کا شکار بھی ہو سکتے ہیں۔ آنکھوں کے امراض کی وجہ سے بچے تعلیمی میدان میں ناکام ہو جاتے ہیں ، ان کی شخصیت کی تعمیر بھی نہیں ہو پاتی جبکہ مستقبل میں بینائی کی کمزوری ملازمت میں بھی رکاوٹ بن سکتی ہے۔ والدین کا فرض ہے کہ سال میں ایک مرتبہ بچوں کی آنکھوں کا ضرور معائنہ کروائیں۔ المصطفیٰ نے بچوں میں آنکھوں کے امراض کی تشخیص اور علاج کیلئے سکول آئی ہیلتھ پراجیکٹ شروع کیا ہے ، مخیر افراد اور ادارے سکولوں میں بچوں کی آنکھوں کے معائنے اور انھیں مفت عینکوں اور علاج کی سہولیات مہیا کرنے کیلئے دل کھول کر مالی تعاون کریں۔ اس موقع پر نظریہ پاکستان ٹرسٹ کے سیکرٹری شاہد رشید نے کہا کہ نظریۂ پاکستان ٹرسٹ کے نظریاتی سمر سکول کا مقصد طلباء کی نظریاتی ‘ تعلیمی و اخلاقی استعدادِکار میں اضافہ کرنا ہے ، نظریاتی سمر سکول کا ماٹو ’’پاکستان سے پیار کرو‘‘ہے ۔
تازہ ترین