وزیر اعظم کے دورۂ امریکا پر قیاس آرائی نہ کی جائے: دفتر خارجہ

10 جولائی ، 2019

دفترِ خارجہ کے ترجمان ڈاکٹر محمد فیصل نے کہا ہے کہ وزیر اعظم عمران خان کے امریکا کے دورے سے متعلق قیاس آرائیوں سے گریز کیا جائے۔

سماجی رابطے کی ویب سائٹ ٹوئٹر پر ایک بیان میں ترجمان دفتر خارجہ نے مزید کہا کہ وزیر اعظم عمران خان کے دورۂ امریکا پر امریکی حکام سے رابطے میں ہیں۔

ڈاکٹر محمد فیصل نے یہ بھی کہا کہ اس سلسلے میں معمول کے مطابق باقاعدہ اعلان مناسب وقت پر کیا جائے گا۔

واضح رہے کہ امریکی محکمۂ خارجہ کی ترجمان مارگن آرٹاگس کہہ چکی ہیں کہ وائٹ ہاؤس نے وزیر اعظم عمران خان کے دورۂ امریکا کی ابھی تصدیق نہیں کی ہے۔

ان کا یہ بھی کہنا ہے کہ انہوں نے پاکستانی وزیر اعظم کے دورے کے بارے میں پڑھا ہے، البتہ تصدیق کے لیے وائٹ ہاؤس سے رابطہ کریں گی۔

ادھر وزیر اعظم عمران خان کے معاونِ خصوصی زلفی بخاری نے وزیر اعظم کے دورۂ امریکا کی تصدیق کر تے ہوئے کہا ہے کہ عمران خان 20 جولائی کو امریکا پہنچیں گے، امریکی حکام اپنے ضوابط پورا کرنے کے بعد اس سلسلے میں اعلان کر دیں گے۔

دوسری جانب ذرائع کا کہنا ہے کہ امریکی صدر ڈونلڈ ٹرمپ اور وزیر اعظم عمران خان کے درمیان 22 جولائی کو وائٹ ہاؤس میں ملاقات ہو گی۔

ذرائع نے یہ بھی بتایا ہے کہ امریکی و پاکستانی وفود کے درمیان ملاقات بھی وائٹ ہاؤس میں ہی ہونی ہے، جس میں ایف اے ٹی ایف، ایران اور افغانستان کے معاملات سمیت خطے کے دیگر اہم امور پر بات چیت متوقع ہے۔

تازہ ترین