بھارت سے ملنے کا فیصلہ شاید درست نہیں تھا، التجا مفتی

03 اکتوبر ، 2019

مقبوضہ کشمیر کی سابق وزیراعلیٰ محبوبہ مفتی کی صاحبزادی التجا مفتی نے کہا ہے کہ کشمیر میں بھارتی مظالم کی انتہا ہو گئی جس کے بعد کشمیری عوام سوچنے پر مجبور ہیں کہ بھارت سے ملنے کا فیصلہ شاید درست نہیں تھا۔

یہ بھی پڑھیے: تنازع کشمیر اور امریکہ

واضح رہے 5 اگست کو کشمیر کی خصوصی حیثیت ختم ہو نے کے بعد مقبوضہ کشمیر میں قابض بھارتی فوج کی پابندیوں کو 2 ماہ ہوگئے ہیں، کرفیو اور دیگر پابندیاں برقرار ہیں جبکہ جگہ جگہ بھارتی فوج کے اہلکاروں کی تعیناتی سے شہری مسلسل خوفزدہ ہیں۔

مقبوضہ کشمیر کی سابق وزیراعلیٰ محبوبہ مفتی کی صاحبزادی التجا مفتی کا برطانوی نشریاتی ادارے کو انٹرویو کے دوران کہنا تھا کہ آج ہر کشمیر ی یہ سوچ رہا ہے کہ کیا تقسیم ہند کے بعد بھارت کے ساتھ رہنے کا فیصلہ صحیح تھا ؟

التجا مفتی نے اپنے انٹرویو کے دوران عمران خان کی امریکی جنرل اسمبلی میں کی گئی تقریر پر بات کرتے ہوئے کہا کہ اقوام متحدہ میں اگر کسی نے کشمیریوں کے لیے بات کی تو وہ عمران خان صاحب تھے، کشمیریوں کی آواز جیسے انہوں نے دنیا کہ سامنے اٹھائی کشمیریوں کو ان پر ناز ہے۔

انہوں نےکہا کہ عمران خان کی تقریر جیسے ہی ختم ہوئی کشمیری کے دلوں میں بھارت مخالف جذبات مزید پیدا ہو گئے جس پر کشمیریوں نے سڑکوں پر نکل کر آزادی کے حق میں نعرے بلند کیے۔

انہوں نے مزید کہا کہ اگر بھارت ہمیں تسلیم کرتا ہے تو کشمیر کے حصے کیوں کر رہا ہے، کشمیر میں اور بھارت میں فرق کیوں ہے، کشمیری بھی اگر بھارتی شہری ہیں تو کشمیریوں اور بھارتیوں کے ساتھ برتاؤ میں فرق کیوں کیا گیا ہے؟ بھارتی حکومت کشمیریوں سے ان کے حق چھین لینا چاہتی ہے۔

التجا مفتی نے کہا کہ انٹرنیٹ سروسسز اس لیے بند کی گئیں کہ کشمیری عوام اپنے جذ بات اور اپنے اوپر ہونے والے مظالم دنیا کو نہ بتا دیں، اگر کشمیریوں کی مکمل طور پر آواز دنیا تک پہنچ گئی تو بھارت کا پوری دنیا کے سامنے جھوٹ کھُل جائے گا۔

تازہ ترین