الیکشن کمیشن کے 2 نئے ارکان کی تقرری کا معاملہ پارلیمنٹ بھجوانے کا حکم

14 اکتوبر ، 2019

اسلام آباد ہائی کورٹ نے الیکشن کمیشن کے دو نئے ارکان کی تقرری کا معاملہ پارلیمنٹ کو بھجوانے کا حکم دے دیا۔

چیف جسٹس اطہر من اللہ نے الیکشن کمیشن کے 2 نئے ارکان کی تقرری کے خلاف کیس میں ریمارکس دیئے کہ کیا آپ الیکشن کمیشن کو نان فنکشنل کرنا چاہتے ہیں؟ پارلیمنٹ اتنا چھوٹا معاملہ بھی حل نہیں کرسکتی؟

انہوں نے کہا کہ کیا وفاقی حکومت ابھی تک ڈیڈ لاک کا دفاع کرنا چاہتی ہے؟ اس پر ایڈیشنل اٹارنی جنرل نے کہا کہ مجھے وفاقی حکومت سے ہدایات لینے کی اجازت دی جائے۔

جسٹس اطہر من اللہ نے ریمارکس دیئے کہ اسپیکر قومی اسمبلی اور چیئرمین سینیٹ الیکشن کمیشن کوغیر فعال ہونے سے بچائیں اور مشاورت سے یہ معاملہ حل کریں ۔

واضح رہےکہ صدر مملکت عارف علوی نے الیکشن کمیشن بلوچستان اور سندھ کے ممبران کی تعیناتی کی تھی جس پر چیف الیکشن کمشنر نے اس تعیناتی کو خلاف آئین قرار دیتے ہوئے نئے ممبران سے حلف لینے سے معذرت کی تھی۔

اس معاملے کے بعد جہانگیر جدون ایڈووکیٹ نے الیکشن کمیشن کے 2 نئے ارکان کی تقرری کو اسلام آباد ہائیکورٹ میں چیلنج کیا تھا جس میں استدعا کی گئی تھی سپریم کورٹ میں مفاد عامہ کی درخواست کے فیصلے تک سماعت روکی جائے۔

تازہ ترین