راولپنڈی (نمائندہ جنگ)لاہورہائیکورٹ راولپنڈی بنچ کے جسٹس مرزا وقاص رؤف نےکرنل ریٹائرڈ انعام الرحیم کیس کوباقاعدہ سماعت کیلئے منظور کرتے ہوئے نو جنوری کی تاریخ مقرر کردی ہے،عدالت عالیہ نے انعام الرحیم ایڈووکیٹ کےبیٹے کی جانب سے دائر درخواست پر وفاق اور وزارت دفاع کو نوٹس جاری کردیا ہے، عدالت عالیہ نے ریمارکس دیئے کل سے پوچھا جارہا ہے کہ انعام الرحیم ایڈووکیٹ کو کس قانون کے تحت اٹھایا گیا ہے لیکن کوئی جواب نہیں دیا جارہا ہے ، سماعت کے موقع پر ایڈیشنل اٹارنی جنرل ساجد الیاس بھٹی جیک برانچ کے ڈائریکٹر لیگل بریگیڈیئر فلک ناز وزارت داخلہ کے نمائندے شہزاد انجم پیش ہوئے اور عدالت سے قانونی معاونت کیلئے مہلت طلب کرتے رہے،عدالت نے سماعت میں وقفہ بھی کیا لیکن سرکار ی وکلاء کی طرف مہلت طلب کی جاتی رہی،عدالت نےسماعت میں دوبار کے وقفے اور دلائل کے باوجود ایڈیشنل اٹارنی جنرل کی طرف سے مزید مہلت کی استدعا پر کیس کو باقاعدہ سماعت کیلئےمنظور کرتے ہوئےنوٹس جار ی کردئیے، جسٹس مرزا وقاص رؤف نے استفسارکیا کہ کس قانون اور شق کے تحت انعام الرحیم ایڈووکیٹ کو تحویل میں لیا گیاہے لیکن سرکاری وکلاء عدالت کو مطمئن نہ کرسکے، واصف خان اور شیخ احسن الدین ایڈووکیٹس نے کرنل انعام الرحیم ایڈووکیٹ کی طرف سے عدالت میں موقف اختیار کیا کہ انعام الرحیم کی حراست غیر قانونی ہے،کرنل( ر)انعام الرحیم جو لاپتہ افراد اور آرمی کے حوالے سے کیسزکی پیروی کر رہے تھے،کو 16 دسمبر کو راولپنڈی میں واقع انکی رہائشگاہ سے اٹھایاگیا تھا،انکے صاحبزادے حسنین انعام نے تھانہ مورگاہ میں ایف آئی آر بھی درج کرائی ہوئی ہے جبکہ محمد واصف خان،ملک وحید اختر،رانا عبدالقیوم اور ڈاکٹر شہزاد اقبال شام ایڈووکیٹ کےذریعے کرنل ریٹائرڈ انعام الرحیم ایڈووکیٹ کی بازیابی کیلئے عدالت عالیہ سے بھی رجوع کررکھا ہے۔
فرمان الہی
نماز کے اوقات
