کورونا وائرس، پاک ایران سرحد دوسرے روز بھی بند

ایران میں کورونا وائرس کے پھیلنے کے سبب پاک ایران سرحد پر امیگریشن گیٹ دوسرے روز بھی بند ہے۔

’پاک ایران سرحد پر آمد و رفت روک دی‘

صوبائی ڈیزاسٹر مینجمنٹ اتھارٹی کے ڈی جی عمران زرکون نے کہا ہے کہ ایران میں کورونا وائرس کا پھیلاؤ اور اس کے باعث اموات کے بعد تفتان کے قریب پاک ایران بارڈر پر تمام آمد و رفت روک دی گئی ہے۔

امیگریشن حکام کے مطابق امیگریشن گیٹ بند ہونے سے سرحد کے دونوں اطراف لوگوں اور گاڑیوں کی آمدورفت معطل ہے جبکہ سرحد کے دونوں اطراف گاڑیوں کی لمبی قطاریں لگ گئیں ہیں۔

امیگریشن حکام کا کہنا ہے کہ تفتان میں فی الحال امیگریشن گیٹ بند رکھنے کی ہدایات دی گئی ہیں اور کسی کو تفتان سے ایران اور ایران سے پاکستان جانے کی اجازت نہیں ہے۔

ایران میں کورونا سے ہلاکتیں 6 ہو گئیں

پڑوسی ملک ایران میں کورونا وائرس سے ایک اور شخص جان کی بازی ہار گیا جس کے بعد ایران میں اس وائرس سے مرنے والوں کی تعداد 6 ہو گئی ہے۔

صوبائی محکمہ صحت بلوچستان کا کہنا ہے کہ کورونا وائرس کی روک تھام کے لیے ایئر پورٹ پرحفاظتی اقدامات موجود ہیں جبکہ ائیر پورٹ پر بیرون ملک سے آنے والے مسافروں کی اسکریننگ جاری ہے۔

کوروناوائرس، کوئی مسافر ایران سے پاکستان داخل نہیں ہوا

صوبائی محکمہ صحت کے مطابق ایران میں کوروناوائرس کی موجودگی کے سبب بلوچستان کی صوبائی حکومت نے حفاظتی اقدامات کرتے ہوئے پاک ایران سرحد سےمنسلک اضلاع میں ایمرجنسی نافذ کر دی اور حفاظتی ڈیسک بھی قائم کر دی ہے

دوسری جانب  گڈز ٹرانسپورٹرزکے مطابق تفتان میں سرحد پر رکے ہوئے مال بردار کنٹینرز میں مالٹا سمیت دیگر سامان لدا ہوا ہے، ایک دن میں مالٹے کے کنٹینر نہیں چھوڑے گئے تو خراب ہوجائیں گے، مالٹا خراب ہونے کے باعث لاکھوں روپےکا نقصان ہونےکا خدشہ ہے۔